Падчас цісканіны і страляніны ў аэрапорце Кабула загінула не менш за 12 чалавек
![Людзі каля аэрапорта ў Кабуле чакаюць магчымасці пакінуць краіну / Reuters](/sites/default/files/styles/gallery_main/public/2023-08/kabul_19_08_2.jpg.webp?itok=h-TMHJ6e)
Людзі каля аэрапорта ў Кабуле чакаюць магчымасці пакінуць краіну / Reuters
Падчас цісканіны і страляніны ў аэрапорце Кабула за апошнія некалькі дзён загінула агулам 12 чалавек. Пра гэта ў чацвер паведаміла агенцтва Reuters са спасылкай на талібаў і прадстаўнікоў NATO.
У чацвер талібы заклікалі афганцаў, якія застаюцца ля аэрапорта, разысціся і вярнуцца дадому. Ім паабяцалі не наносіць шкоды. Гэты заклік прагучаў на наступны дзень пасля таго, як "баевікі Талібана абстралялі пратэстоўцаў, забіўшы, са слоў відавочцаў, траіх", піша Reuters .
Агенцтва прыводзіць словы людзей, якіх не пускалі на тэрыторыю аэрапорта.
"Гэта поўная катастрофа. Талібы стралялі ў паветра, штурхалі людзей, збівалі іх", — расказаў адзін з удзельнікаў падзей.
![При давке и стрельбе в аэропорту Кабула погибли не менее 12 человек](/sites/default/files/paragraphs/image/kabul1908.jpg)
Аэрапорт застаецца зонай адказнасці ЗША, таму сюды імкнуцца людзі, якія хочуць пакінуць краіну. Тым часам за межамі аэрапорта тэрыторыю патрулююць ужо баевікі "Талібана".
Па словах прадстаўніка заходніх службаў бяспекі, з нядзелі з Кабула вылецела каля 8000 чалавек.
Між тым прэзідэнт ЗША Джо Байдэн заявіў у сераду, што ЗША могуць захаваць свой вайсковы кантынгент у Афганістане і пасля 31 жніўня. Гэта адбудзецца ў тым выпадку, калі да гэтага моманту не атрымаецца эвакуяваць з краіны ўсіх амерыканскіх грамадзян.
"Мы зробім усё, што ад нас залежыць, каб эвакуяваць усіх амерыканцаў і ўсіх нашых саюзнікаў", — сказаў амерыканскі прэзідэнт у інтэрв'ю тэлеканалу АВС. Паводле яго слоў, ЗША плануюць вывезці з краіны таксама ад 50 тысяч да 65 тысяч афганцаў.
У сярэдзіне красавіка Джо Байдэн абвясціў аб рашэнні завяршыць аперацыю ў Афганістане і вывесці адтуль амерыканскія войскі. Пасля гэтага радыкальны рух "Талібан" пачаў браць кантроль над краінай. 15 жніўня баевікі без бою ўвайшлі ў Кабул. Прэзідэнт краіны Ашраф Гані пакінуў краіну. Заходнія краіны пачалі эвакуацыю сваіх грамадзян.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.