Некалькі дзясяткаў падпісчыкаў прыйшлі ў мінскую ДАІ падтрымаць відэаблогера

Некалькі дзясяткаў падпісчыкаў прыйшлі ва ўпраўленне мінскай ДАІ падтрымаць відэаблогера Сяргея Ціханоўскага, аўтара канала "Краіна для жыцця", інфармуе Радыё Свабода. 6 кастрычніка яго каманда арганізавала стрым з пікета Мікалая Статкевіча на плошчы Свабоды.

Пазней супрацоўнікі ДАІ спынілі аўтамабіль Ціханоўскага, даставілі яго ў Ленінскае РУУС і склалі адміністрацыйны пратакол за таніраванае шкло ў машыне (усе астатнія іх падазрэнні не пацвердзіліся).

Па позве ў ДАІ відэаблогер мусіў прыйсці 14 кастрычніка. Сяргей Ціханоўскі лічыць сябе невінаватым, ён заклікаў сваіх падпісчыкаў падтрымаць яго. І адгукнулася шмат людзей. Сярод 30 чалавек былі не толькі мінчукі, але і жыхары Гродна, Гомеля, Ліды. Яны прысутнічалі на разглядзе адміністрацыйнай справы і воплескамі падтрымлівалі Ціханоўскага.

Штраф склаў 12,75 рубля. Відэаблогер назваў прысуд "цыркам" і "фарсам".

"Сказалі, што мяне, аказваецца, ніхто не затрымліваў, — распавядае Сяргей Ціханоўскі. — ...Я думаю, яны хацелі адабраць наша абсталяванне, з дапамогай якога мы вялі стрым. Альбо проста запалохаць".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.