Вы тут

На скрадзеныя ў амерыканскіх банках грошы беларус адчыніў кавярню ў Гродне

Справа пра крадзеж з амерыканскіх банкаў / sk.gov.by

Жыхар Беларусі некалькі гадоў краў грошы з амерыканскіх банкаў — з 2012-га па 2016-ы. Крымінальную справу супраць яго расследуе Галоўнае следчае ўпраўленне Следчага камітэта, паведамляе прэс-служба ведамства. 

Дзякуючы супрацы Следчага камітэта Беларусі і ФБР ЗША ўдалося выявіць, што да злачынства мае 28-гадовы гродзенец. Пры ператрусе ў яго дома праваахоўнікі забралі камп'ютарную тэхніку, носьбіты інфармацыі, абароненыя складанымі паролямі, а таксама грошы і дакументы.

Як паведамляе следства, мужчына краў грошы з замежных банкаў і пераводзіў іх на рахункі, зарэгістраваныя на падстаўных асоб. Потым мужчына абналічваў крадзеныя грошы. 

Таксама следства выявіла, што гродзене купляў тавары і паслугі, выкарыстоўваючы рэквізіты чужых банкаўскіх плацежных картак.

Скрадзеныя грошы мужчына ўкладаў у біткоіны. Таксама ён на гэтыя грошы купіў аўтамабіль і адчыніў уласную кавярню. 

Следчыя кажуць пра больш як 60 выяўленых эпізодаў супрацьпраўнай дзейнасці мужчыны. На віртуальных кашальках гродзенца праваахоўнікі вывілі 94 біткоіны.

Мужчыну выставілі абвінавачванне ў крадзяжы з выкарыстаннем камп'ютарнай тэхнікі ў асабліва буйным памеры. Яго ўзялі пад варту. 

Гродзенец прызнаў віну ў поўным аб'ёме. Падчас папярэдняга следства ён заключыў дасудовае пагадненне аб супрацоўніцтве, а таксама пастараўся кампенсаваць прычыненую шкоду і вярнуць незаконна атрыманы даход. Ён даў праваахоўнікам доступ да крыптакашалькоў, каб яны маглі вывесці біткоіны і накласці арышт на атрыманую суму — больш за 630 тысяч еўра ў эквіваленце. Таксама следчыя арыштавалі іншыя яго грошы, маёмасць і нерухомасць на агульную суму больш за 100 тысяч еўра.

Расследаванне крымінальнай справы працягваецца.

Справа пра крадзеж з амерыканскіх банкаў / sk.gov.by

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.