Мінздароўя: Антытытунёвы закон могуць прыняць у Беларусі ўжо сёлета
![Мінздароўя: Антытытунёвы закон могуць прыняць у Беларусі ўжо сёлета](/sites/default/files/styles/gallery_main/public/2023-08/kurenne.jpeg.webp?itok=N99V0qqP)
Антытытунёвы закон могуць прыняць у Беларусі да канца года або нават хутчэй. У гэтым упэўнены міністр аховы здароўя Васіль Жарко. Як заявіў сёння журналістам кіраўнік ведамства, дакумент ужо прайшоў усе ўзгадненні і накіраваны на подпіс Аляксандру Лукашэнку.
Закон, скіраваны на барацьбу з курэннем, быў падрыхтаваны Мінздароўя яшчэ ў 2013 годзе. У ім былі прапісаныя радыкальныя захады, якія цяпер рэалізуюцца згодна з некаторымі іншымі нарматыўнымі актамі. Да такіх захадаў можна аднесці забарону на курэнне ў грамадскіх месцах, поўную забарону на рэкламу тытунёвых вырабаў і іх выкладку ў крамах. Сярод іншых захадаў, якія закладзеныя ў закон і могуць рэалізавацца — істотнае павышэнне акцызаў на цыгарэты.
Паводле звестак САЗ, павышэнне падаткаў на тытунь на 10% вядзе да зніжэння яго спажывання на 4%. У Беларусі ўдзельная вага падатку ў цане тытунёвых вырабаў складае крыху болей за 40%, пры гэтым у Польшчы і Латвіі — 80%, у Літве — 75%, ва Украіне — амаль 60%, перадае TUT.by
Фота: bizoomie.com