"Мінёр" суда ў Мазыры пакінуў нумар тэлефона апазіцыянера Андрэя Павука (відэа)

Чалавек, які паведаміў пра мініраванне Мазырскага суда, пакінуў нумар тэлефона апазіцыянера Андрэя Павука. Пра гэта міліцыянты паведамілі самому Павуку.

Як распавядала Еўрарадыё, 15 траўня невядомы паведаміў, што будынак суда ў Мазыры замініраваны. З будынка былі эвакуяваныя ўсе людзі, сам суд быў ачэплены. 

Дарэчы, у ім мусіў прайсці працэс над блогерам Віталём Манько, якога вінавацяць у стварэнні фінансавай піраміды. Жонка Манько заяўляе, што мужа пераследуюць па палітычных прычынах. 

Міліцыянт паведаміў, што Павука апытваюць як сведку ў справе. Па яго словах, паведамленне пра мініраванне суда прыйшло на сайт МНС. У ім быў пазначаны мабільны тэлефон Павука. 

Апазіцыянера ўжо затрымлівалі 20 сакавіка па падазрэнні ў фальшывым паведамленні аб мініраванні. Тады ад ягонага імя невядомыя паведамілі пра мініраванне Акцябрскага райвыканкама. Дома ў Павука прайшоў ператрус, праваахоўнікі забралі ў яго тэхніку.