Мінгарвыканкам: "Калі Міхалок хоча правесці канцэрт — хай звяртаецца"

Сёння вядзе прамую лінію галоўны ідэолаг Мінгарвыканкама Ігар Карпенка. Слухаўку здымае не гэты чыноўнік, а яго яго памочнік.  

Еўрарадыё: У мяне пытанне, ці ёсць у Беларусі “чорныя спісы” музыкаў?

Мінгарвыканкам: Не, першы раз чую пра гэта. Мяркую, што няма.

Еўрарадыё: Добра, а чаму тады канцэрты гэтых музыкаў зрываюцца па смеху вартых прычынах і беларусы замест таго, каб ехаць у Мінск на канцэрты Міхалка, Вольскага, Вайцюшкевіча, едуць у Вільню? Ці можна арганізаваць канцэрт гэтых музыкаў у Мінску?

Мінгарвыканкам: Да нас у выканкам яны не звярталіся, я думаю, што гэтыя пытанні павінна вырашаць Міністэрства культуры.

Паўтараю пытанне, ці далі б згоду на канцэрт Міхалка ў Мінску чыноўнікі Мінгарвыканкама?

Мінгарвыканкам:  Калі б яны да нас звярнуліся, службы нашыя паглядзелі б  і нейкіх забарон няма. Ёсць правілы для арганізатараў канцэртаў.

Еўрарадыё: Дык калі б яны звярнуліся, ці ёсць такія прычыны, якія не дазволілі б вам даць згоду на канцэрт?

Мінгарвыканкам: Як вы кажаце “чорныя спісы”, такога няма. Я не гатовы вам падрабязна адказаць, трэба паглядзець заканадаўчую базу. Пачакайце на тэлефоне.

Чыноўнік перадае слухаўку намесніку намесніку начальніка ўпраўлення — начальніку аддзела  ўстаноў культуры і культурна-асветніцкай дзейнасці Сяргею Мядзведзеву. Яму я паўтараю пытанне пра “чорныя спісы” музыкаў, пра прычыны, з якіх ім нельга выступаць на тэрыторыі Беларусі, і пра канцэрты па-за межамі Беларусі.

Мядзведзеў: Не не чуў пра такія спісы, што за спісы?

Еўрарадыё: Чорныя спісы музыкаў, якім негалосна забаронена выступаць на тэрыторыі Беларусі.

Мядзведзеў: А што за выканаўцы?

Еўрарадыё: Ляпісы, Вайцюшкевіч, Вольскі хаця б!

Чыноўнік нешта сабе памячае, перапытвае прозвішчы выканаўцаў.

Мядзведзеў: А калі ў іх зрываліся канцэрты?

Еўрарадыё: Вы так здзіўляецеся, што быццам і не ведаеце, што канцэрты музыкаў адмяняюцца ў апошні момант!

Нагадаем, канцэрты музыкаў неаднаразова зрываліся. Да прыкладу, канцэрт выканаўцы Зміцера Вайцюшкевіча ў лютым 2015 адмянілі быццам бы з-за пазыкі клуба, дзе мелася адбыцца мерапрыемства, па электрычнасці — і клуб з-за гэтага павінен быў прыпыніць сваю дзейнасць. Канцэрты музыкам адмянялі і ў іншых гарадах Беларусі, відавочна, што чыноўнікам не хапае фантазіі, каб знайсці прычыны, па якім можна было б адмяніць канцэрт. Да прыкладу, у магілёўскім клубе, дзе мусіў адбыцца канцэрт "Ляпісаў", за некалькі гадзін да мерапрыемства пачаў працякаць дах...

Выступ Змітра Вайцюшкевіча ў клубе “Піраты” ўсё ж не адбудзецца

Міністр культуры: Яшчэ раз паўтараю, што чорных спісаў у Беларусі не існуе

Мядзведзеў: Вы зразумейце, канцэрты на тэрыторыі краіны арганізуюцца . І мы любыя прапановы прымаем, разглядаем. Няхай звяртаюцца да нас.

Еўрарадыё: Добра, дык калі да вас звернецца Міхалок, ці дазволіце вы яму правесці канцэрт?

Мядзведзеў: Мы кіруемся ўказам прэзідэнта № 257, там дакладна прапісана, па якіх прычынах канцэрт не можа адбыцца. Я не ведаю, а якія перашкоды вы маеце на ўвазе? Няхай ён (Сяргей Міхалок — заўвага Еўрарадыё.) звяртаецца, мы разгледзім яго заяву, як і любую іншую.

За канцэрты без “гастролькі” будуць штрафаваць