Міліцыянты ў Мінску паказалі рэпетыцыю разгону дэманстрацый

У Мінску на базе Цэнтра падрыхтоўкі, павышэння кваліфікацыі і перападрыхтоўкі кадраў 8 лютага праходзіць пасяджэнне калегіі МУС, паведамляе прэс-служба ведамства.

Разам з кіраўнікамі МУС у ім прымаюць удзел іншыя сілавікі. Гэта дзяржсакратар Савета бяспекі Аляксандр Вальфовіч і яго намеснік Аляксандр Рахманаў, намеснік генпракурора Сяргей Хмарук, старшыня Следчага камітэта Дзмітрый Гара, начальнік упраўлення па пытаннях абароны і праваахоўных органаў апарату Савета міністраў Дзмітрый Кірушчанка.

Перад пачаткам пасяджэння кіраўніцтву сілавікоў паказалі, як АМАП і ўнутраныя войскі разганяюць дэманстрацыі. Таксама госці паглядзелі выставу ўзбраення і тэхнічных сродкаў спецпадраздзяленняў МУС.