Месца пахавання маці Лукашэнкі фатаграфаваць "непажадана"

Маці Аляксандра Лукашэнкі Кацярыну Трафімаўну пахавалі 26 траўня на могілках вёскі Хімы ў Аршанскім раёне Віцебшчыны. Могілкі знаходзяцца недалёка ад роднай вёскі кіраўніка дзяржавы — Александрыі-2, у якой яго маці пражыла амаль усё жыццё.

Як паведамляе Радыё "Свабода", магіла нябожчыцы ўся ў вянках. Сярод астатніх яна нічым не вылучаецца, хіба колькасцю вянкоў. Над магілаю драўляны крыж з таблічкай, на якой пазначаныя гады жыцця Кацярыны Трафімаўны.

Але фатаздымкі магілы і саміх могілак журналісту давялося выдаліць. На гэтым настаялі двое мужчын, якія назваліся прадстаўнікамі сям’і нябожчыцы. Па іх словах, сваякі Кацярыны Трафімаўны не хочуць, каб такія фатаграфіі з'яўляліся ў прэсе да сарака дзён па нябожчыцы. Так сама настойліва яны рэкамендавалі журналісту не фатаграфаваць і сядзібу на месцы знесенай старой хаты, у якой жыла Кацярына Трафімаўна і вырас Аляксандр Лукашэнка. Мужчыны ветліва і карэктна параілі журналісту "Свабоды" не турбаваць да саракавін і аднавяскоўцаў маці Лукашэнкі.

Нагадаем, што пра смерць 90-гадовай Кацярыны Трафімаўны Лукашэнкі стала вядома 26 траўня. У гэты ж дзень яе пахавалі.

Як маці Лукашэнкі адгаворвала сына ад прэзідэнцтва