"Мая воля была паралізаваная". Выкладчыцу ПДУ загіпнатызавалі і знялі ў порна
У сацсетцы "ВКонтакте" распаўсюджваецца "развітальны ліст" ад імя выкладчыцы Полацкага дзяржаўнага ўніверсітэта Тамары П. У лісце гаворыцца пра намер 48-гадовай жанчыны звольніцца з ПДУ, прадаць кватэру і назаўжды з'ехаць з Наваполацку. Прычына — порнаролік з яе ўдзелам, зняты яе партнёрам пяць гадоў таму: відэа быццам бы распаўсюджваецца "ў лакальнай сетцы праваахоўных органаў па ўсёй Рэспубліцы Беларусь".
Таксама існуе відэа, у якім жанчына, падобная да Тамары П., чытае тэкст ліста.
Хто такая Тамара П.?
Магістр юрыдычных навук Тамара П. сапраўды працуе на кафедры крыміналістыкі і крымінальнага права ПДУ. Яна аўтар некалькіх дзясяткаў навучальных матэрыялаў па адміністрацыйным праве, юрыдычнай этыцы. Загадчыца кафедры Алена Ярмац кажа, што бачыла ліст, "і шмат хто ўжо яго бачыў". Але каментаваць напісанае Алена Мікалаеўна не бярэцца: "Я сама крыху ў шокавым стане".
Супрацоўнікі кафедры спрабавалі скантактавацца з Тамарай П., але яна не здымала слухаўку. У Еўрарадыё таксама не атрымалася датэлефанавацца да выкладчыцы.
Малодшы сын Тамары П. Альгерд паведаміў нам, што "з ёю ўсё ў парадку". Але дадаў, што ні ён, ні яго мама пакуль што не хочуць абмяркоўваць апошнія падзеі.
Што сказана ў лісце?
Сем гадоў таму жанчына балюча перажывала развод з мужам, з якім пражыла амаль дваццаць гадоў і вырасціла дваіх дзяцей. У 2010 годзе ў яе жыцці з'явіўся новы мужчына. Выкладчыца была знаёмая з яго сынам, які навучаўся на завочным аддзяленні юрфака ПДУ.
Адносіны цягнуліся два гады.
"[Ён] пастаянна рабіў мне кампліменты, называў прыгожай жанчынай, упэўніваў мяне, што я вартая самага лепшага ў гэтым жыцці, называў мяне самай вартай жанчынай з усіх вартых жанчын".
Рамантыка скончылася ў кастрычніку 2012 года. А нядаўна жанчына даведалася пра існаванне пікантнага відэа з яе ўдзелам. У лісце сказана, што ролік далі паглядзець яе старэйшаму сыну, які працуе ў сістэме праваахоўных органаў. Хлопец не ведаў, што на экране з'явіцца яго мама.
Калі верыць зместу ліста, відэа размешчанае "ў раздзеле "публічныя жанчыны-прастытуткі" лакальнай сеткі, доступ да якой маюць праваахоўнікі з усёй Беларусі. Па словах аўтара ліста, доступ да роліка можна атрымаць за грошы — "відэа набрала мноства платных праглядаў".
"Відэазапіс зроблены без майго ведама і згоды, не ведала, што здымалі, ніколі б не пагадзілася на здымку такога характару, ніколі не прымала ўдзелу ў такіх здымках. У маім дачыненні быў прыменены псіхічны гвалт, у выніку якога мая воля была цалкам паралізаваная (гіпнатычнае ўздзеянне адчувала на сабе)".
Жанчына піша, што адчувае небяспеку для свайго жыцця: "Калі са мной адбудзецца страшнае, не верце, што гэта адбылося выпадкова".
Ці будзе міліцыя расследаваць гэтую справу?
У наваполацкай міліцыі Еўрарадыё пацвердзілі, што прынялі яе зварот ад Тамары П.
"Ён толькі сёння [12 траўня] паступіў, толькі сёння зарэгістраваны. Таму ніякай іншай інфармацыі я вам даць не магу", — распавялі Еўрарадыё па тэлефоне аператыўна-дзяжурнай службы Наваполацкага ГАУС.
