Людміле Рублеўскай прысудзілі Нацыянальную літаратурную прэмію
Пісьменніцы Людміле Рублеўскай прысудзілі Нацыянальную літаратурную прэмію за твор “Авантуры Пранціша Вырвіча, здрадніка і канфедэрата”. Цырымонія абвяшчэння пераможцаў прайшла 3 верасня ў Полацку ў межах святкавання Дня беларускага пісьменства. Рублеўская атрымала прэмію як аўтар найлепшага празаічнага твору.
У намінацыі “Паэзія” прэміяй уганаравалі Анатоля Аўруціна за зборнік "Прасвятленне”. Крытык Валерый Назараў быў адзначаны за працу “Тайнапіс Андрэя Мрыя”.
Іншыя ўзнагароды разьмеркавалі такім чынам:
Найлепшы драматургічны твор — Васіль Ткачоў, зборнік “Характары”.
Найлепшы публіцыстычны твор — Зіновій Прыгодзіч, зборнік “Постаці”.
Найлепшы твор для дзяцей — Міхаіл Пазднякоў, зборнік казак “Возера Дзіва”.
Дэбют — Маргарыта Лышкевіч, зборнік “Яблыкі”.
Нацыянальная літаратурная прэмія заснаваная Міністэрствам інфармацыі Беларусі. Яе пераможцаў узнагароджваюць каштоўнымі прызамі і грашовымі прэміямі. Сёлета яна ўручалася ў трэці раз, перадае БЕЛТА.
