Лукашэнка пра кадравыя перастаноўкі : Орша — апошняя кропля
Аляксандр Лукашэнка патлумачыў свае кадравыя рашэнні, у выніку якіх змянілася вярхушка ўраду і кіраўнікі шэрагу міністэрстваў і ведамстваў. Нагадаем, што сёння стала вядома пра прызначэнне прэм’ерам Сяргея Румаса, першым віцэ-прэм’ерам — Аляксандра Турчына, віцэ-прэм’ерамі — Ігара Ляшэнкі, Уладзіміра Кухарава, Ігара Пятрышчанкі.
Змены ва ўрадзе адбыліся пасля нарады ў Оршы, падчас якой Аляксандр Лукашэнка жорстка раскрытыкаваў працу кабінета міністраў. На сённяшняй кадравай нарадзе ён заявіў, што ранейшыя заявы не былі спантанным рашэннем.
“Дык вось, я хачу сказаць: справа не толькі ў Оршы. Гэта апошняя кропля, якая перапоўніла келіх цярпення. Галоўнае — у глыбіні. І вы, людзі недалёкія ад ўраду (а некаторыя працавалі ў гэтых пасадах, няхай не на першых ролях), разумееце, што не можа быць ніякіх рознагалоссяў і розначытанняў у правядзенні курсу развіцця нашай краіны”, — цытуе Лукашэнку яго прэс-служба.
“У нас ва ўрадзе, не буду называць прозвішчы, было так: давайце мы вось курс гэты заявім, а потым будзем праводзіць іншы курс (у іншых жа краінах так робіцца). Так у мяне ніколі не было і не будзе!” — сказаў Лукашэнка.
Ён назваў два прыярытэтныя кірункі развіцця краіны — дысцыпліна і незалежнасць.
“Мы будзем незалежныя, калі ў нас эканоміка будзе развівацца так, як належыць. Калі мы абрынем эканоміку, ніякай незалежнасці быць не можа. Ніякія славаблуддзі не ўратуюць нас ад разбурэння”, — сказаў кіраўнік краіны.
