А калі YouTube заблакуюць? Як беларусу выбраць разумны тэлевізар і не аблажацца

20/02/2024 - 14:19

Што раяць кансультанты крам? / @rubanau_collage

Па тэлевізары ўжо даўно можна глядзець не толькі "Беларусь 1" або "РТР-Беларусь". "Разумныя" тэлікі сёння каштуюць разумных грошай — і замест "Клуба рэдактараў" дазваляюць бавіць вечары, гледзячы YouTube, серыялы на Netflix або Amazon, ці за праглядам сусветных навін праз дадаткі CNN і іншых медыя. Але нават калі тэлік стары і зусім не smart — яго можна лёгка абнавіць, набыўшы спецыяльную прыстаўку.

Другое рашэнне куды прасцейшае і таннейшае, чым, напрыклад, спадарожнікавыя талеркі. І ўжо напраўду менш прыкметнае. Сёння, каб павесіць талерку, патрэбны дазвол выканкама, інакш могуць з'явіцца пытаннечкі. Хоць яны могуць з'явіцца і з дазволам, мы ж у Беларусі. А са Smart TV такога не будзе.

Як выбраць разумны тэлевізар і не памыліцца? Еўрарадыё разабралася ў пытанні для тых, хто хоча самастойна абіраць, што глядзець у Беларусі.

Варыянт першы: прыстаўкі

На выпадак, калі тэлевізар не падтрымлівае Smart TV, распрацоўшчыкі некаторых АС прыдумалі прыстаўкі. Яны падключаюцца да тэлевізараў, якія маюць HDMI альбо AV-раздым і ператвараюць іх у сучасныя прылады з выхадам у інтэрнэт.

У продажы ў беларускіх крамах на выбар ёсць некалькі мадэляў прыставак з АС ад Android TV і Google TV. Прыставак ад Tizen і WebOS няма.

Прыстаўкі на Google TV прапануе кампанія Xiaomi, цэны на іх стартуюць ад 269 рублёў. З Android TV можна купіць бюджэтныя прыстаўкі фірмы Miru — ад 179 да 259 рублёў.

Кансультант крамы бытавой тэхнікі расказаў журналісту Еўрарадыё, які звярнуўся пад выглядам пакупніка, што смарт-прыстаўкі ўжо не такія папулярныя.

— Яны мала прадаюцца, многія тэлевізары і так ідуць з убудаваным Smart TV. Канкрэтна ў нас у краме, будзе добра, калі адну прыстаўку купяць раз на два месяцы.

Калі тэлевізару больш за 10 гадоў, спецыялісты раяць не купляць прыстаўку, а ўзяць новы тэлевізар з убудаванай Smart-сістэмай:

— Па якасці тэлевізары сталі нашмат лепшыя, гэта тычыцца і падсветкі, і распазнавання, і гуку. Але калі чалавека задавальняе яго тэлевізар, то можна спакойна купляць прыстаўку і карыстацца ёй, гады тры яна дакладна папрацуе.

Папулярныя сістэмы: Android TV і Google TV

Што тычыцца адрозненняў у асноўных сістэмах разумных тэлевізараў, розніцы паміж Android TV і Google TV практычна няма.

— Абедзве аперацыйныя сістэмы па-свойму добрыя. Яны адрозніваюцца толькі візуальна. Магчыма, Android-сістэма будзе крыху прасцейшай для ўспрыняцця. Яшчэ прыстаўкі на Google TV з'ядаюць больш аператыўнай памяці. А так, функцыянал і праграмы адныя і тыя ж. Шараговы карыстальнік наўрад ці адчуе розніцу, — запэўніў супрацоўнік крамы.

Android TV і Google TV могуць быць прадстаўленыя тэлевізарамі розных вытворцаў. Супрацоўнік крамы параіў звярнуць увагу на фірму Philips або Sony, але апошняй няма ў продажы праз санкцыі.

Яшчэ адна сістэма: Tizen

Гэтая аперацыйная сістэма ад Samsung на базе Linux разлічаная на тых, хто любіць гульні. У ёй ёсць свой браўзер і крама дадаткаў.

Кансультант звярнуў увагу, што тэлевізары гэтай аперацыйнай сістэмы ў Беларусі лепш купляць не старэйшыя за 2023 год, таму што большасць праграм у больш ранніх мадэлях будуць недаступныя.

— Амаль усе тэлевізары, якія былі ў нас у продажы, моцна тармазілі, у асноўным, бо слабенькі працэсар. Яшчэ адна вялікая праблема — адсутнасць крамы дадаткаў, гэта значыць, чалавек зможа выкарыстоўваць толькі тыя праграмы, якія ўжо былі загадзя ўсталяваныя. Да нядаўняга часу там нават браўзера не было, але ў новых мадэлях, здаецца, дадалі.

Еўрарадыё паглядзела, якія дадаткі стаяць у такіх тэлевізарах: "Кинопоиск HD", "НТВ", "Первый", "Смотрим" — гэта значыць, толькі расійскія. Пра магчымасць свабодна глядзець тое, што хочацца, гаворкі не ідзе.

Акрамя таго, ёсць вялікія пытанні і да бяспекі выкарыстання "Яндэкса": кампанія цесна супрацоўнічае з расійскімі ўладамі, усе звесткі карыстальнікаў могуць быць перададзеныя сілавікам, а пра свабоду ў экасістэме казаць не выпадае. Напрыклад, неўзабаве пасля пачатку ўварвання Расіі ва Украіну "Яндэкс" выдаліў усе незалежныя беларускія медыя.