Германія афіцыйна прызнала трэці пол

Урад Германіі вырашыў дадаць права выбару трэцяга полу ў кнігі актаў грамадзянскага стану. Пра гэта паведамляе "Беларускі партызан" са спасылкай на твітар-акаўнт Федэральнага міністэрства ўнутраных спраў гэтай краіны.

Адпаведную папраўку ў заканадаўстве абмяркоўвалі менш за год. Такім правам змогуць карыстацца толькі тыя людзі, якія ад нараджэння маюць прыкметы абодвух палоў (інтэрсэксуалы). Усе дарослыя інтэрсэксуалы таксама змогуць змяніць запіс у пашпарце.

Летась нямецкія СМІ пісалі, што ад 80 да 100 тысяч жыхароў краіны лічаць сябе інтэрсэксуаламі ці не адчуваюць прыналежнасць да аднаго з двух існуючых палоў. 

Дарэчы, яшчэ да Нямеччыны правы інтэрсэксуалаў былі ўзаконеныя ў Аўстраліі ды Індыі.