Фотафакт: каля "Мінск-Арэны" перакуліўся вайсковы аўтамабіль
![Фотафакт: каля "Мінск-Арэны" перакуліўся вайсковы аўтамабіль](/sites/default/files/styles/gallery_main/public/2023-08/ac9cd24c153e968ced115fc56e433e02438bfdfc5bb372da3fpimgpsh_fullsize_distr.jpg.webp?itok=YJyqUmKL)
Каля 10-й раніцы 2 чэрвеня ў раёне "Мінск-Арэны" перакуліўся вайсковы аўтамабіль. Паведамленні аб сур'ёзнай аварыі з удзелам вайсковага транспарту з'явіліся ў сацсетках. Адна з відавочцаў аварыі даслала Еўрарадыё фота з месца падзей і расказала пра тое, што ўбачыла.
"Вось зараз уязджала ў горад па праспекце Пераможцаў, у 10 гадзін. Вельмі вялікі корак утварыўся, машыны стаяць, аб'язджаюць. Я калі бліжэй пад'ехала, то ўбачыла вялікую вайсковую машыну з надпісамі "Меддапамога". Яна была перакуленая, ляжала па цэнтры дарогі ўверх коламі. Яшчэ адна легкавая стаяла побач разбітая. "Хуткія дапамогі" стаяць, шмат даішнікаў, таксама вайскоўцы. Я так разумею, яны там ехалі. Магчыма, рыхтаваліся да параду, да святкаванняў", ― расказвае Еўрарадыё відавочца Ганна.
Як паведаміў БЕЛТА інспектар аддзела па агітацыі і прапагандзе ДАІ ГУУС Мінгарвыканкама Арцём Цыбулька, перакуліўся УАЗ ваенных медыкаў. Аўтамабіль не паспеў затармазіць перад Mercedes-Benz, які спыніўся на чырвоны сігнал святлафора. Каб пазбегнуць сутыкнення, кіроўца вайсковага аўто рэзка павярнуў у бок. Машына згубіла ўстойлівасць і перакулілася. Дваіх вайскоўцаў павезлі ў бальніцу для абследавання.
Вайсковая тэхніка ў горадзе знаходзіцца ўжо некалькі дзён. Ідзе актыўная падрыхтоўка да параду, прымеркаванага да 3 ліпеня, Дня незалежнасці Рэспублікі Беларусь.