Еўрасаюз патрабуе вызвалення палітвязня Віктара Бабарыкі
Еўрасаюз патрабуе неадкладнага вызвалення Віктара Бабарыкі і іншых беларускіх палітвязняў, а таксама затрыманых журналістаў, "людзей, якія знаходзяцца за кратамі за здзяйсненне сваіх асноўных правоў". "Рэжым павінен спыніць рэпрэсіі і несправядлівасць, і прыцягнуць вінаватых да адказнасці", — гаворыцца ў заяве прэс-службы знешнепалітычнай службы ЕС.
6 ліпеня ў Мінску Бабарыка быў асуджаны на 14 гадоў пазбаўлення волі.
ЕС абяцае працягнуць "свае намаганні па прыцягненню да адказнасці за жорсткія рэпрэсіі" ўладаў Беларусі. Адначасова Брусель заклікае афіцыйны Мінск "да ўсёабдымнага і сапраўднага палітычнага дыялогу з прадстаўнікамі дэмакратычнай апазіцыі і грамадзянскай супольнасці пры садзейнічанні АБСЕ" і да "новых свабодных і справядлівых выбараў".
У заяве нагадваецца пра ўведзеныя санкцыі і пра тое, што ЕС "гатовы разгледзець далейшыя меры".
