ЕС спадзяецца на прагрэс у візавым пытанні падчас перамоваў з Беларуссю

Еўрасаюз спадзяецца на прагрэс у спрашчэнні візавага рэжыму з Беларуссю. Пра гэта агенцтву БелаПАН паведамілі ў Еўракамісіі.

12 сакавіка ў Мінску пройдзе трэці раўнд перамоваў па спрашчэнні візавага рэжыму і рэадмісіі. У ЕС спадзяюцца, што падчас гэтых перамоваў удасца вырашыць усе нявырашаныя пытанні. У той жа час у Еўракамісіі не каментуюць хаду перамоўнага працэсу.

На пачатку сакавіка намесніца міністра замежных спраў Беларусі Алена Купчына заявіла журналістам, што Беларусь не дасягнула з ЕС паразумення наконт бязвізавых паездках па дыпламатычных пашпартах, а таксама для чальцоў афіцыйных дэлегацый. Купчына адзначыла, што цяпер у Еўрасаюзе ідуць дыскусіі пра новую пазіцыю на перамовах з Беларуссю.

Па яе словах, пагадненні аб спрашчэнні візавага рэжыму і аб рэадмісіі могуць быць парафіраваныя на саміце Усходняга партнёрства ў Рызе ў траўні.

Фота — bdg.by