Экс-сілавік усумніўся ў зліве Макара, але і да Кулажанкі шмат пытанняў

08/06/2022 - 11:51

У гісторыі са злівам дзіўна ўсё: і запіс, і рэакцыя тых, хто "размаўляў" / калаж Улада Рубанава, Еўрарадыё

У гісторыі са злівам дзіўна ўсё: і запіс, і рэакцыя тых, хто "размаўляў" / калаж Улада Рубанава, Еўрарадыё

Зліў запісу, на якім нібыта былы сілавік Ігар Макар разам з байцом палка Каліноўскага Паўлам Кулажанкам плануе забойства Андрэй Стрыжака, выклікаў велізарны рэзананс. І яшчэ больш пытанняў.

Еўрарадыё спытала ў былога беларускага сілавіка найвышэйшага звяна Яраслава (імя змененае), што не так з запісам, як на самай справе абмяркоўваюцца падобныя рэчы і чаму Кулажанка не спяшаецца абвяргаць гутарку.

"Кагосьці трэба тэрмінова вывесці з дошкі"

— Складана гаварыць пра сапраўдную матывацыю, але проста так падобныя рэчы не выцякаюць. Звычайна так адбываецца, калі ёсць унутраная дзяльба тэрыторыі або сфер уплыву, кагосьці трэба тэрмінова вывесці з дошкі, — кажа Яраслаў.

На думку эксперта, наўрад ці Макар або Кулажанка маглі зрабіць больш тонкі ход. Аднак гэты зліў можа быць адцягваннем увагі ад чагосьці больш сур'ёзнага.

Экс-силовик усомнился в сливе Макара, но и к Кулаженко много вопросов

Макар заяўляе, што Кулажанка схіляў яго забіць Стрыжака / скрыншот з відэа

Асноўныя заўвагі да запісу: ён парэзаны, размова ненатуральная — больш падобная да маналогу, згадваюцца прозвішчы і словы, якія звычайна не выкарыстоўваюцца. З гэтага вынікае дзве версіі. Альбо размова несапраўдная. Альбо Макар правакаваў Кулажанку сказаць канкрэтныя рэчы. У другім выпадку ёсць вялікія пытанні да прафесіяналізму тых, хто размаўляў.

— Мы не можам ведаць, былі гэтыя дыялогі ў адзін перыяд часу або, напрыклад, расцягнутыя на год. Звычайна, калі хочуць прыпячатаць кагосьці доказамі, выкладваюць канкрэтны неразрэзаны кавалак, — сумняваецца ў праўдзівасці запісу суразмоўнік.

Магла быць і "кантраляваная гутарка", каб сабраць кампрамат на Кулажанку.

— Калі ты ведаеш, што ідзе запіс, і спрабуеш нейкім словамі, кручкамі псіхалагічнымі выцягнуць чалавека на рэакцыю ў адказ.

"Калі яны так паляцца, сумна за іх"

Некаторыя фармулёўкі ў размове знарочыста простыя. Быццам іх павінны зразумець абсалютна ўсе, падкрэслівае эксперт.

— Профі з профі так не размаўляюць. Не кажуць "завядзенне крымінальнай справы", "будзем выкарыстоўваць атруту", "кампрамат". Два спецы выкарыстоўвалі б больш слэнгу. "Атруты" — гэта для беларускага тэлевізара, каб усім пенсіянерам было зразумела, што чалавек абмяркоўвае, як трэцяга чалавека забіць.

Складваецца ўражанне, што камусьці справаздачу рыхтуюць ці людзі наогул адзін з адным не размаўляюць, а іх звялі ў адзін запіс. Можа, яны зусім ужо схібілі і здзічэлі, але мне не верыцца ў сапраўднасць гэтай размовы.

У абедзве версіі ўпісваецца згадка прозвішчаў Ціханоўскай і Стрыжака.

— Ніякіх прозвішчаў гучаць не павінна — гэта закон для профі. Тым больш калі яна кіраўніца, духоўная лідарка. Раз ужо вы, хлопцы, пайшлі ў шэрую зону, не думаю, што вы б так паліліся. Калі яны так паляцца, то зусім сумна за іх.

Маўчанне Кулажанкі

Павел Кулажанка / фота з сацыяльных сетак

З таго часу як запіс трапіў у сеціва, Павел Кулажанка не дае каментароў па гэтым пытанні.

— Калі б я адчуваў, што мяне падстаўляюць або зліваюць, я б, хутчэй за ўсё, зрабіў нейкую заяву. Тут два варыянты. Першы — калі ты адчуваеш, што ты абсалютна легальны ў месцы, дзе знаходзішся. Каб тваё імя не ачарнілі, ты робіш контрзаяву, прычым сур'ёзную, можа, нават з дадаваннем гутарковых файлаў у адказ, — працягвае Яраслаў.