Брэсцкае "Дынама" не згоднае з дыскваліфікацыяй свайго капітана

Футбольны клуб "Дынама-Брэст" не згодны з дыскваліфікацыяй свайго капітана Аляксея Гаўрыловіча на чатыры матчы.

Рашэнне пра дыскваліфікацыю футбаліста 19 красавіка прыняў кантрольна-дысцыплінарны камітэт Беларускай федэрацыі футбола. Нагодай стаў эпізод у гульні паміж БАТЭ і брэсцкім "Дынама" ў матчы 3-га тура чэмпіянату Беларусі. Гаўрыловіч наступіў  на нагу абаронцу БАТЭ Неманье Мілунавічу, ад чаго той атрымаў траўму і не змог выйсці на поле ў наступным матчы ў Кубку Беларусі. Эксперты вырашылі, што Гаўрыловіч наступіў на саперніка наўмысна. 

"Мы лічым, што нават у выпадку, калі ў спрэчным эпізодзе мела месца парушэнне правілаў, прызначэнне адзінаццаціметровага ўдару, выдаленне гульца і асабліва дыскваліфікацыя на чатыры матчы — неправамерныя пакарання. Таксама не прынятыя пад увагу прабачэнні Аляксея Гаўрыловіча, прынесеныя Неманье Мілунавічу неадкладна пасля заканчэння першага тайма, а таксама адсутнасць прэтэнзій па дадзеным інцыдэнце з боку сербскага абаронцы", — гаворыцца ў заяве брэсцкага клуба.

Брастаўчане дзякуюць Мілунавічу за аб'ектыўнасць.

Пасля гэтага дынамаўцы звяртаюць увагу на тое, што гульцы БАТЭ таксама дапускаюць грубую гульню.

"У сваю чаргу лічым неабходным завастрыць увагу на момантах з удзелам гульцоў БАТЭ, якім не была дадзена прававая ацэнка.

1. У матчы Кубка Беларусі 11 красавіка 2017 года Неманья Мілунавіч гуляе груба супраць нападніка "Дынама-Брэст" Джоэля Фамее. За гэты эпізод Мілунавіч атрымлівае папярэджанне замест выдалення.

2. У матчы 18-га тура вышэйшай лігі-2017 гулец БАТЭ Мікалай Сігневіч без спробы згуляць у мяч груба дзейнічае супраць Аляксея Гаўрыловіча, у выніку чаго атрымлівае жоўтую картку замест выдалення.

Нас абураюць спробы прадставіць нашага капітана ў ролі адмоўнага персанажа. Футбол — кантактны від спорту, дзе кожны гульнявы ​​момант падлягае разбору і аналізу. Няма і не можа быць ніякіх доказаў таго, што дадзены інцыдэнт быў наўмысным", — заяўляюць у брэсцкім клубе.