Вы тут

Больш за 100 краін вырашылі да 2030 года скончыць з высяканнем лесу. А Беларусь?

Паказчык лясістасці адзін з самых высокіх у Еўропе / pixabay

Больш за сто сусветных лідараў падпісалі дэкларацыю, у якой паабяцалі клапаціцца пра лясы.

"Мы абавязуемся працаваць разам, каб спыніць і павярнуць назад працэс знікнення лясоў і дэградацыі зямель да 2030 года, забяспечваючы пры гэтым устойлівае развіццё і прасоўваючы інклюзіўныя пераўтварэнні ў сельскіх раёнах",гаворыцца ў тэксце дакумента.

Беларусі сярод падпісантаў няма. Чаму?

 

"У нас адваротная карціна"

Гэта пагадненне — адно з галоўных дасягненняў на саміце Рамачнай канвенцыі ААН аб змене клімату ў Глазга. Сусветныя лідары і кіраўнікі ўрадаў сабраліся тут, каб вырашыць, як ратаваць планету.

На краіны, якія далучыліся да дэкларацыі і збіраюцца ратаваць лес, прыпадае 85% усіх лясных масіваў свету. Сярод іх ёсць Расія, Бразілія, Кітай, ЗША, краіны Афрыкі, ЕС. А Беларусі няма.

Міністэрства лясной гаспадаркі не прымае ўдзелу ў канферэнцыі: за пытанні клімату ў Беларусі адказвае Мінпрыроды. Але ў Мінлясгасе растлумачылі, чаму наша краіна не далучылася да гэтага прагрэсіўнага дакумента.

— Проста ў Беларусі ў прынцыпе няма такой праблемы, лесу ў краіне з кожным годам становіцца больш. Сёлета ў нас паказчык лясістасці — 40,1%. Гэта адзін з самых высокіх паказчыкаў у Еўропе — мы ўваходзім у дзясятку самых лясістых краін.

У Беларусі адзін з самых высокіх паказчыкаў лясістасці ў Еўропе / pixabay

Да дэкларацыі далучыліся лідары краін, у якіх востра стаіць праблема высякання лесу з мэтай арганізацыі на свабоднай тэрыторыі сельскагаспадарчай вытворчасці.

У Расіі ёсць праблема лясных пажараў. У іх гарыць лес, яны вымушаныя яго высякаць. У Бразіліі, Кітаі, Індыі лясы высякаюцца, каб на гэтай тэрыторыі ствараць плантацыі і збіраць з гэтай тэрыторыі больш ураджаю. У нас сітуацыя адваротная: мы пераводзім землі з сельгаскарыстання ў склад ляснога фонду.

І за адзін толькі мінулы год мы забралі 70 тысяч гектараў зямель і перавялі іх у лясны фонд. Растуць у нас і плошчы ляснога масіву, і запасы драўніны.

Па звестках міністэрства, з 2015 да 2020 года працэнт лясістасці ў Беларусі падрос на 1,4 працэнтнага пункта. З суседзяў паказчык лясістасці вышэйшы толькі ў Латвіі і ў Расіі.

 

Сусветныя лідары пра лес

Такім чынам, лясы паглынаюць вуглякіслы газ, гэта значыць становяцца хаўруснікамі сусветных лідараў у тым, каб нарэшце дасягнуць дамоўленасцяў Парыжскага пагаднення ад 2016 года. Тады дамовіліся прыкласці намаганні, каб не дапусціць росту глабальных тэмператур больш чым на 1,5 градуса.

Борыс Джонсан: "У нас ёсць шанц пакласці канец доўгай гісторыі чалавецтва як пераможцы прыроды і стаць яе захавальнікам"

Уладзімір Пуцін вельмі разлічвае на лес, калі гаворыць пра імкненне дасягнуць вугляроднай нейтральнасці да 2060 года. Вугляродная нейтральнасць не азначае поўнай адсутнасці выкідаў і не значыць, што да 2060 года Расія перастане пампаваць з нетраў, каб сагрэцца. Гэта значыць, што ўзровень выкідаў вуглякіслага газу не будзе перавышаць тых яго аб'ёмаў, якія могуць паглынуць акіян і лясы.

Звяртаючыся да ўдзельнікаў форуму ў Глазга, Пуцін выказаў упэўненасць, што дэкларацыя "несумненна, паслужыць дасягненню мэт Парыжскага пагаднення па зніжэнні колькасці вуглякіслага газу ў атмасферы".

Сярод краін, якія падпісаліся пад дэкларацыяй, — Бразілія з яе велізарнымі запасамі лесу. Якія, зрэшты, з прыходам да ўлады Жаіра Балсанару становяцца меншымі. Прынамсі, экалагічная арганізацыя AllRise падала на прэзідэнта пазоў у Гаагскі суд праз маштабнае высяканне лясоў Амазоніі. Актывісты расцэньваюць гэта як злачынства супраць чалавечнасці.

І хоць Бразілія падпісалася пад дэкларацыяй, актывісты з Human Rights Watch ураду пакуль не вераць — спасылаюцца на дрэнны паслужны спіс. А яшчэ на адсутнасць аператыўнага плана дзеянняў.

У Бразіліі ёсць і яшчэ адна праблема — незаконнае высяканне лясоў. Human Rights Watch гаворыць пра тое, што лес высякаецца пад прыкрыццём злачынных сетак, а актывісты, якія спрабуюць з гэтым змагацца, сутыкаюцца з пагрозамі і гвалтам і не заўсёды знаходзяць падтрымку ў судах. Ад урада актывісты патрабуюць зусім простага — гарантый абароны.

Прэзідэнт ЗША Джо Байдэн таксама заступіўся за лес і паабяцаў дапамагчы лесу матэрыяльна.

"Я абвяшчаю пра новы план захавання лясоў ва ўсім свеце, які аб'яднае ў сабе ўвесь набор інструментаў урада ЗША — дыпламатычных, эканамічных і палітычных, — каб спыніць знікненне лясоў, аднавіць жыццёва важныя паглынальнікі вугляроду і палепшыць землеўпарадкаванне", — сказаў Байдэн.

Да 2030 года дзякуючы гэтаму плану і 9 млрд амерыканскіх долараў удасца аднавіць каля 2 млрд гектараў лесу і іншых экасістэм па ўсім свеце.

Борыса Джонсана, брытанскага прэм'ера, які прымае саміт у гасцях, усё гэта вельмі парадавала. Пасля таго як сусветныя лідары дамовіліся паклапаціцца пра лес, ён напісаў у твітар: у чалавецтва з'явіўся шанц стаць не пераможцам прыроды, а яе захавальнікам.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.