Беларускія навукоўцы не вераць амерыканцам, што ў нас няма сланцавага газу
Прадстаўнікі геалагічнай службы Беларусі станоўча ацэньваюць перспектывы выяўлення на тэрыторыі нашай краіны запасаў карысных выкапняў.
Нагадаем, напярэдадні паведамлялася, што Інфармацыйна-даследчае ўпраўленне Міністэрства энергетыкі ЗША не змясціла Беларусь у лік краін, дзе прысутнічаюць запасы сланцавага газу і нафты. Намеснік гендырэктара "Белгеалогіі" Яраслаў Грыбік перакананы, што такія высновы не могуць быць праўдзівымі.
"Атрымаць звесткі пра запасы карысных выкапняў па рэгіёне можна толькі на падставе вынікаў геалагічных даследаванняў дадзенай тэрыторыі", — цытуе яго словы БЕЛТА. Грыбік адзначыў, што амерыканцам не перадаваліся геалагічныя дадзеныя аб беларускіх нетрах.
Беларускі навуковец нагадвае, што існуюць перспектывы выяўлення запасаў сланцавага газу і сланцавай нафты на тэрыторыі Гомельскай вобласці.
