Вы тут

Адзіны ў Беларусі прытулак для птушак просіць вашай дапамогі

Птушкам часта не выратавацца без дапамогі чалавека

У Беларусі ёсць толькі адзін прытулак для дзікіх птушак — "Ахова прыроды". Ім займаюцца муж і жонка Аляксандр і Жанна Сталяровы: яны дапамагаюць птушкам са зламанымі крыламі, апёкамі і іншымі траўмамі. Выходжваюць, дапамагаюць аднавіцца — і адпускаюць.

Нядаўна прытулак звярнуўся да беларусаў па дапамогу: туды трэба купіць рэнтген-апарат.

— Нам трэба паменшыць нашы выдаткі ў прытулку, — расказвае Еўрарадыё Жанна Сталярова. — Рэч у тым, што да нас паступае ад 40 да 70 птушак у месяц, кожнай трэба ад дзвюх да чатырох праекцый рэнтгену, гэта мінімальная колькасць. Гэта досыць дорага.

Такім чынам, танней мець свой апарат. А патрэбен ён для таго, каб разумець, якая ў птушачкі праблема: пералом, іншароднае цела ў страўніку, інфекцыя, разрыў звязак ці нешта іншае.

Так выглядае рэнтген-здымак крумкача / прытулак "Ахова прыроды"

У 2019-м прытулак перажыў сур'ёзнае выпрабаванне — пажар. Цяпер ён не толькі аднавіўся, але і пашыраецца.

— Мы ўжо адбудаваліся і нават пашырылі тэрыторыю. Было менш за гектар, цяпер ужо ёсць паўтара. Збіраемся браць яшчэ тры гектары, таму што паступае птушак досыць шмат. Каб іх размяшчаць, патрэбна вялікая плошча, — расказвае Жанна і прызнаецца: — Шчыра кажучы, я не чакала, што ў нас будзе такая колькасць птушак — больш за 130, а гэта вельмі шмат.

Цяпер у прытулку ёсць новыя зімоўнікі, вальеры. Але іх усё роўна не хапае.

Часцей за ўсё птушкі, якія паступаюць у прытулак, атрымліваюць траўмы ці захворваюць праз чалавека.

— Ёсць святлозабруджанасць: птушка ноччу прымае водбліскі ад ліхтароў за ваду і прызямляецца на зямлю, а некаторыя віды потым не могуць узляцець. Таксама гэта правады, у якіх блытаюцца птушкі. Плюс іх збіваюць машыны, часам яны атрымліваюць страсенні мазгоў ад сутыкнення з вышыннымі будынкамі. Таксама Wi-Fi, 3G, 4G — усё гэта ўплывае на навігацыю птушак, — дадае яна.

На шчасце, выпадкі наўмыснага прычынення шкоды птушкам бываюць рэдка. Апошні жудасны выпадак — калі ў кастрычніку ў Лагойску знайшлі лебедзя з адсечанай дзюбай.

— Я паведаміла пра гэту сітуацыю дзяржорганам, яны шукаюць браканьера, — падзялілася Жанна. — Гэта было шакавальнай навіной для ўсіх, таму што птушка так плавала некалькі дзён. Вядома, мы правялі аперацыю, але выратаваць яе не ўдалося: траўма была несумяшчальная з жыццём.

Мэтанакіравана шкоды птушкам людзі амаль не прычыняюць, дадае яна.

Заклік з просьбай дапамагчы з рэнтгенам прытулак размясціў днём 16 снежня. Да моманту нашай размовы водгукаў хлопцы і дзяўчаты атрымалі няшмат. Хоць у цэлым чакаюць дапамогі.

— Ёсць, дарэчы, такі варыянт: калі ў нейкай клініцы ёсць ужываны апарат і калі хтосьці на спонсарскіх пачатках можа нам яго перадаць — таксама вельмі задаволіць.

Дапамагчы прытулку для птушак і даведацца крыху больш пра яго работу вы можаце на яго сайце.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.