Ад расійскага ракетнага ўдару па Адэсе пацярпеў музей са спісу ЮНЕСКА

У ноч на 6 лістапада расіяне нанеслі па Адэсе ўдар ракетамі "Онікс" і "Іскандэр". Яны трапілі ў цэнтр горада і закансерваваны прамысловы аб'ект.

Ад выбуховай хвалі і абломкаў пацярпелі шматпавярховікі і мастацкі музей, які належыць да Сусветнай спадчыны ЮНЕСКА.

У будынку пашкоджаныя сцены, выбітыя некаторыя шыбы, паведаміў у тг-канале кіраўнік ваеннай адміністрацыі Адэскай вобласці Алег Кіпер.

У выніку атакі былі параненыя восем чалавек. Пяцярых шпіталізавалі, а яшчэ трое маюць нязначныя раненні і атрымалі неабходную дапамогу на месцы.