Мінчука будуць судзіць за забойства і здзек з трупа
Галоўнае следчае ўпраўленне Следчага камітэта завяршыла расследаванне крымінальнай справы пра забойства 14-гадовай жыхаркі вёскі Вязынка Маладзечанскага раёна.
Здарэнне адбылося сёлета ў ліпені. З вечара 29 ліпеня школьніцу шукалі як зніклую без вестак. Урэшце яе цела знайшлі са слядамі гвалтоўнай смерці 1 жніўня ў лесе недалёка ад месца жыхарства. Неўзабаве быў затрыманы падазраваны ў злачынстве.
Следства выявіла, што 24-гадовы мінчук, які быў у адной кампаніі з 14-гадовай школьніцай, пагадзіўся правесці яе дадому. Па шляху дадому, у лесе каля садовага таварыства "Ударнік", паміж маладымі людзьмі ўзнік канфлікт, падчас якога хлопец задушыў дзяўчынку. Паводле інфармацыі следства, абое яны былі нецвярозымі.
Следчыя правялі шэраг допытаў абвінавачанага і сведак, а таксама праверылі сведчанні на месцы. Згодна з комплекснай псіхолага-псіхіятрычнай экспертызай абвінавачаны цалкам усведамляў свае дзеянні і мог кіраваць імі.
Як выявіла судова-медыцынская экспертыза, прычынай смерці дзяўчынкі стала механічная асфіксія (задушэнне).
Мінчука вінавацяць у забойстве і здзеку з трупа. Ён знаходзіцца пад вартай.
Крымінальная справа перададзена пракурору для накіравання ў суд.