За секс на вуліцы ў Міжнародны жаночы дзень пары пагражае турма
![Будзьце асцярожнымі](/sites/default/files/styles/gallery_main/public/2024-04/erik-lucatero-nrhlqxdfut0-unsplash.jpg.webp?itok=fuzLrmRd)
Будзьце асцярожнымі / unsplash.com
У Мінску за секс на вуліцы будуць судзіць сямейную пару. Крымінальная справа ўжо накіравана ў суд і можа абярнуцца для абодвух шасцю гадамі зняволення.
Што здарылася?
У сакавіку пасля святкавання Міжнароднага жаночага дня пара выйшла з кафэ і адасобілася на вуліцы. Момант блізкасці знялі падлеткі, якія праходзілі побач. Потым відэа трапіла ў міліцыю.
Праз некалькі дзён пару затрымалі. Імі аказаліся замежныя грамадзяне, якія нядаўна набылі кватэру ў цэнтры сталіцы.
— Абвінавачаныя нідзе афіцыйна не працаўладкаваны, на ўтрыманні маюць дзіця, раней да крымінальнай адказнасці не прыцягваліся, — каментуюць сітуацыю ў пракуратуры. — Ім прад'яўлена абвінавачанне ў наўмысных дзеяннях, якія груба парушаюць грамадскі парадак і выказваюць відавочную непавагу да грамадства, якія адрозніваюцца па сваім змесце выключным цынізмам, учыненых групай асоб, гэта значыць у злачынстве, прадугледжаным ч. 2 арт. 339 КК Рэспублікі Беларусь, санкцыя якой — аж да шасці гадоў пазбаўлення волі. Віну муж і жонка прызналі цалкам, у зробленым раскаяліся.
На дадзены момант пара знаходзяцца пад падпіскай аб нявыездзе.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.