Юрый Шаўчук адмовіўся выступаць у Цюмені ў зале з літарай Z
![Юрый Шаўчук адмовіўся выступаць у Цюмені ў зале з літарай Z](/sites/default/files/styles/gallery_main/public/2023-08/zauczuk-2204.jpg.webp?itok=j8IDexFm)
Расійскі рок-гурт ДДТ адмовіўся выступаць на пляцоўцы ў Цюмені, дзе намалявалі літару Z. Пра гэта лідар гурта Юрый Шаўчук расказаў у інтэрв'ю журналісту Аляксандру Плюшчаву на яго YouTube-канале.
"Можа, забараніць наш канцэрт вырашылі, бо мы памянялі залу. У нас была зала заяўленая для канцэрту, і там яны намалявалі вялізную літару Z. Мы адмовіліся там граць, перанеслі канцэрт у іншую залу. Іншую залу нам ужо не далі", — распавёў Шаўчук.
Літара Z выкарыстоўваецца як сімвал расійскай агрэсіі супраць Украіны. У шэрагу краін яе публічнае выкарыстанне забароненае і караецца штрафамі.
Прэс-сакратар Цюменскага канцэртна-тэатральнага аб'яднання Наталля Рабкова ў каментары парталу 72.RU заявіла, што не ведае прычыны пераносу канцэрта.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.