Вы тут

Вікторыя Пальчыс: Імя для дачкі выбірала сама, Эдуарду яго сказаў адвакат

Эдуард Пальчыс разам з жонкай Вікторыяй / Еўрарадыё​

Жонка палітвязня Эдуарда Пальчыса Вікторыя дала вялікае інтэрв'ю reform.by. У ім яна распавяла, што цяпер жыве ў Вільні разам з дачкой, якая нарадзілася 16 снежня, і якую Эдуард бачыў яе толькі на фотаздымках. Выбралі для вас самае важнае з гэтага інтэрв'ю.

Другі раз не так страшна

Першы раз Вікторыя Пальчыс стала жонкай палітвязня ў 2016 годзе. Тады Эдуарда — блогера, вядомага пад нікам "Джон Сільвер", пасадзілі пасля вострых публікацый аб адносінах Беларусі, Расіі і Украіны на яго сайце 1863x. Гэта скончылася судом і"хатняй хіміяй".

Другі раз не так страшна. З папярэдняга вопыту я разумею, куды трэба звяртацца, як пісаць заявы. Мне прасцей, таму што ёсць напрацоўкі. Да таго ж тое, што цяпер адбываецца з Эдуардам, гэта частка вялікай гісторыі, якая адбываецца цяпер у Беларусі.
 

Пра жанчын у беларускіх пратэстах

Я не магу сказаць, што гэта жаночая рэвалюцыя. У рэвалюцыю ўцягнутыя ўсе пласты грамадства. У нас нават непаўналетнія сядзяць па палітычных прычынах. Жанчыны гэтак жа падвяргаліся катаванням і збіццю, як і мужчыны. Улады зусім не падзяляюць, каго рэпрэсаваць. Жанчыны падтрымліваюць ўсіх мужчын, якія апынуліся за кратамі. Вельмі важна, каб усім людзям пасля адсідкі было куды вярнуцца.
 

Пра бацькоў

— Ім цяжка думаць пра тэрміны, якія пагражаюць Эдзіку, але яны трымаюцца і падтрымліваюць яго. Яны малайцы. Нараджэнне ўнучкі таксама для іх стала антыдэпрэсантам і дае пазітыўную павестку. Яны пераключыліся на ўнучку.

Ці пазнае дачка аб тым, што адбываецца ў сям'і

— Тут два варыянты. Першы: яна падрасце і будзе задаваць пытанні, а Эдзік яшчэ будзе сядзець — тады давядзецца распавядаць. А другі варыянт — Эдзік ужо сам будзе на волі, і мы раскажам ёй разам. Гэта частка нашай сямейнай гісторыі, і не трэба яе хаваць.

На якім этапе справа

Эдуард Пальчыс знаходзіцца за кратамі без малога шэсць месяцаў. Увесь гэты час ён адмаўляецца супрацоўнічаць са следствам. Магчыма, менавіта таму "расследаванне" прасоўваецца павольна, і ў суд справа патрапіць няхутка.

— Яны са следчым не бачацца. Гэта значыць Эдзік сядзіць у турме, а Следчы сам сабе працуе са справай. У адваката падпіска аб невыдаванні, і яна не можа сказаць нешта канкрэтнае. Але гаворкі пра суд не было яшчэ.

Дачка на фотаздымках і імя праз адваката

Самыя кранальныя моманты інтэрв'ю звязаны з дачкой. Вікторыя Пальчыс кажа, што імя Эмілія выбрала для дзяўчынкі сама, а мужу, які на той момант ужо 2,5 месяца быў у СІЗА, пра сваё рашэнне паведаміла праз адваката. Эдуарду імя спадабалася - ён сказаў, што гэта "самае яно".

Першы раз муж ўбачыў дачку на фотаздымках.

— Пасылалі яму і ў лістах фатаграфіі, і адвакат паказвала фатаграфіі дачкі. Яна не можа пакінуць яму гэтыя фота, але Паказаць можа. Лісты з фотаздымкамі спачатку не даходзілі, але потым пачалі даходзіць. Эдуард пастаянна цікавіцца, як дачка есць, як спіць, як праходзіць яе дзень, на каго яна падобная, што яна навучылася рабіць.

Эдуарду Пальчысу 29 гадоў. Ён вядомы і як публіцыст, заснавальнік сайта 1863x.com. З канца верасня 2020 года знаходзіцца ў зняволенні — спачатку адбываў 30 сутак адміністрацыйнага арышту, а потым, калі не выйшаў на волю, стала вядома, што ён стаў фігурантам крымінальнай справы. 

Беларускія праваабаронцы прызналі яго палітвязнем. "Пасябраваць" з ім можна праз сайт politzek.me. Там жа-адрас, па якім яму можна напісаць ліст:

Пальчыс Эдуард Аляксандравіч, СІЗА-1, вуліца Валадарскага, 2, Менск, 220030.

Блогер і грамадскі актывіст, Пальчыс удзельнічаў у арганізацыі дзён Волі, у тым ліку — у #БНР100 у 2018 годзе, калі 100-годдзе абвяшчэння Беларускай Народнай Рэспублікі адзначалі каля Опернага тэатра ў Менску.

Улады абвінавачваюць Эдуарда Пальчыса ў арганізацыі масавых беспарадкаў паводле артыкула 293 КК, за што яму можа пагражаць ад 5 да 15 гадоў пазбаўлення волі. Праваабаронцы лічаць абвінавачванне беспадстаўным, незаконным і накіраваным "на недобраахвотнае спыненне ім сваёй публічнай дзейнасці". Яны патрабуюць вызвалення блогера і спынення крымінальнага пераследу.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.