Ва Украіне расфармавалі за марадзёрства батальён "Шахцёрск"
Гэта было падраздзяленне патрульнай службы міліцыі асаблівага прызначэння.
"Батальён "Шахцёрск", які выдатна змагаўся пад Ілавайскам, быў мной распушчаны загадам міністра таму, што неаднаразовыя выпадкі марадзёрства ў горадзе Валнаваха (раённы цэнтр на захадзе Данецкай вобласці — Еўрарадыё) і ў іншых сітуацыях мелі месца", — цытуе словы міністра ўнутраных спраў Украіны Арсена Авакава УНІАН.
Авакаў дадаў, што ўчынкі 50 марадзёраў зганьбілі цэлы батальён з 700 байцоў. У іншых падраздзяленнях МУС давялося ўзмацніць дысцыпліну, каб не дапусціць такіх выпадкаў.
Нагадаем, батальён "Шахцёрск" быў створаны ў пачатку лета, ён прыняў прысягу на вернасць украінскаму народу ў Днепрапятроўску ў ліпені.
