У Вене прадстаўнікі рэжыму Лукашэнкі не рашыліся паслухаць Ціханоўскую
Святлана Ціханоўская ў Вене / t.me/tsikhanouskaya/
У Вене прадстаўнікі рэжыму Аляксандра Лукашэнкі не рашыліся паслухаць выступ Святланы Ціханоўскай. Удзельнікі дэлегацыі на чале з Андрэем Савіных (старшынём пастаяннай камісіі Палаты прадстаўнікоў па міжнародных справах) выйшлі з залы, дзе праходзіла пасяджэнне ПА АБСЕ. Савіных, дарэчы, выступаў і паўтараў звычайныя прапагандысцкія штампы, гаварыў пра неабходнасць перамоваў для "аднаўлення механізмаў бяспекі ў Еўропе", пра "добрасуседства Беларусі".
Кіраўніца Аб'яднанага пераходнага кабінета Беларусі Святлана Ціханоўская ў сваім выступе звярнула ўвагу камітэта Парламенцкай асамблеі на канкрэтныя крокі, "якія АБСЕ можа зрабіць ужо зараз, каб паўплываць на сітуацыю ў нашай краіне". Яна прапанавала прызначыць дакладчыка па Беларусі, не прызнаваць вынікі "выбараў" у РБ і выключыць так званы "беларускі парламент" з асамблеі, а на яго месца запрасіць назіральнікамі прадстаўнікоў беларускага дэмруху.
"Людзі, якія будуць прызначаныя [на "выбарах" у РБ], не рэпрэзентуюць народ Беларусі, — гаварыла Ціханоўская. — Ім не патрэбны дыялог. Яны разглядаюць Парламенцкую Асамблею АБСЕ як трыбуну для распаўсюджвання хлусні і апраўдання тэрору... Ці хочаце вы весці дыялог з катамі і забойцамі?".
Падчас сэсіі АБСЕ амерыканскі кангрэсмен Джо Уілсан аб'явіў хвіліну маўчання па палітвязнях Ігару Ледніку і Аляксею Навальнаму.
Today, I asked a simple question at the @oscepa: Do you want to have a dialogue with torturers & murderers? Lukashenka’s cronies do not speak for our people. Don't give a seat to a regime that murders political prisoners. Help us create a truly democratic #Belarus instead. pic.twitter.com/JNk0QuA8Dq
— Sviatlana Tsikhanouskaya (@Tsihanouskaya) February 22, 2024
