У Мінску з'явіўся першы комплекс суперхуткай зарадкі для электрамабіляў

У Мінску на разваротным коле ў мікрараёне Брылевічы з'явіўся першы комплекс суперхуткай зарадкі для электрамабіляў. Як піша sb.by, на яго тэрыторыі працуюць 8 станцый: 7 — на 100 кВт і адна суперхуткая на 350 кВт. Апошні варыянт дазваляе зарадзіць аўтамабіль за 10 хвілін на 300 км прабегу.

Прысутны на ўрачыстым адкрыцці комплексу намеснік прэм'ер-міністра Пётр Пархомчык заявіў, што ён унікальны — у краінах СНД нічога падобнага няма.Таксама ён адзначыў, што ў будаўніцтве выкарыстоўваліся асноўныя камплектуючыя беларускай вытворчасці. Паводле слоў Пархомчыка, у нашай краіне распрацаванае і ўсё праграмнае забеспячэнне.

Да 2030 года плануецца пабудаваць у краіне 87 падобных суперхуткіх зарадных комплексаў. А пакуль у Беларусі дзейнічае 628 зарадных станцый, 435 з якіх — станцыі хуткай зарадкі.