У Лондане паўторна арыштавалі італьянскага мафіоза
Даменіка Ранкадорэ ў сакавіку выйграў суд супраць экстрадыцыі і здолеў застацца ў Вялікабрытаніі.
Цяпер яго зноў затрымалі ў яго доме ў прыгарадзе брытанскай сталіцы паводле новага еўрапейскага ордэра на арышт, які паступіў з Італіі ў пятніцу, інфармуе ВВС.
Згодна з гэтым ордэрам, Ранкадорэ павінен адбыць сямігадовы турэмны тэрмін на Сіцыліі.
Італьянец жыве ў Лондане пад чужым іменем ужо 20 гадоў. На Сіцыліі яго завочна асудзілі за сувязь з мафіяй у 1999 годзе.
У сакавіку Ранкадорэ, якога італьянская паліцыя шукае з 1994 года, выйграў суд супраць экстрадыцыі. Згодна з рашэннем суда, у перапоўненых італьянскіх турмах могуць быць парушаныя правы мафіёза.
Пракуратура мела намер абскардзіць гэтае рашэнне, аднак не паспела своечасова падрыхтаваць апеляцыйную скаргу.
