У Лельчыцах дзяцей кармілі пратэрмінаваным мясам
Такія парушэнні выявіў Камітэт дзяржкантролю пры праверцы Лельчыцкага райпо (раённага спажывецкага таварыства).
Як паведамляе БелаПАН, з цэха паўфабрыкатаў райпо пратэрмінаваныя мясныя прадукты пастаўляліся ва ўстановы адукацыі сістэматычна. Гэтымі прадуктамі кармілі дзяцей у школах і дашкольных установах.
Так, са студзеня па кастрычнік 2012 года было адгружана 4,5 тоны пратэрмінаваных мясных паўфабрыкатаў і катлетнага мяса больш як на 250 мільёнаў рублёў. У студзені—лютым 2013 года пастаўкі пратэрмінаванага мяса склалі 0,4 тоны амаль на 26 мільёнаў рублёў.
Акрамя таго, выяўленыя і іншыя парушэнні. Камітэт дзяржкантролю Гомельскай вобласці за гэтыя і іншыя парушэнні прыцягнуў да адміністрацыйнай адказнасці 16 службовых асоб райпо.
Фота — vetka.by