У дзень візіту Пуціна Расія абвясціла пра батальённыя вучэнні ў Беларусі

Расійскія вайскоўцы ў Беларусі правядуць батальённыя тактычныя вучэнні, паведамляе "Інтэрфакс" са спасылкай на Мінабароны РФ.

Гэтыя вучэнні называюць завяршальным этапам зладжвання рэгіянальнай групоўкі войскаў Беларусі і Расіі.

Таксама расійскае Мінабароны заявіла, што іх вайскоўцы на беларускіх палігонах "працягваюць курс інтэнсіўнай баявой падрыхтоўкі".

"Заняткі па баявой падрыхтоўцы і зладжванне падраздзяленняў Заходняй ваеннай акругі праводзяцца ў дзённы і начны час ", — гаворыцца ў паведамленні прэс-службы.

Дарэчы, заява пра батальённыя вучэнні была агучаная ў дзень, калі расійскі кіраўнік Уладзімір Пуцін прыбывае з афіцыйным візітам у Мінск.

У лістападзе расійскае вайсковае ведамства заяўляла, што на беларускіх палігонах трэніруюцца расійскія танкісты, артылерысты, падраздзяленніяў сувязі, радыёэлектроннай барацьбы, інжынераў і медыцынскі атрад спецыяльнага прызначэння Заходняй ваеннай акругі.

Мінабароны Беларусі казала, што ў краіну прыбудуць да 9 тысяч расійскіх вайскоўцаў і некалькі соцень адзінак бронетэхнікі.