Сямейная пара ўз'ядналася праз 25 гадоў і знайшла згублены пярсцёнак. #ІхНоравы

30/05/2024 - 13:37

#ІхНоравы / Калаж Улада Рубанава, Еўрарадыё

Звычайна мы чытаем міжнародныя навіны, каб не забываць, што заўсёды можа быць горш. Але часам мы чытаем іх, каб нагадаць сабе, што добра таксама можа быць.

Сёння пачнём агляд з добрых навін, а не як звычайна.

Другі шанс

Амерыканцы Дэвід і Ліса пазнаёміліся ў 80-я. Дэвід кажа, што тады ён быў "бэд боем", любіў вечарынкі, і праз восем гадоў шлюбу Ліса вырашыла з ім развесціся.

Дэвід завязаў з алкаголем праз год пасля разводу. І вось ён сядзеў з братам на прычале — і выпадкова выпусціў у ваду пярсцёнак, які працягваў насіць, нягледзячы на тое, што жонка ад яго сышла.

Прайшло 25 гадоў... і Дэвід з Лісай вырашылі, што яны ўсё яшчэ хочуць быць разам. Пара пайшла да таго самага прычала, дзе Дэвід згубіў пярсцёнак, і наняла каманду дайвераў (самі разумееце навошта). І так, здарыўся цуд: праз столькі гадоў яны адшукалі згублены пярсцёнак! Калі першага цуду — уз'яднання пасля ўсіх гэтых гадоў — вам не хапіла.

История этого чуда

Бачыце, у свеце ёсць і добрыя навіны. Але пра іншыя мы вам таксама раскажам.

Як зарабляюць папулісты?

Колькасць ахвяраванняў радыкалам у апошнія гады вырасла. Чвэрць палітычных ахвяраванняў у Еўрасаюзе ідзе на падтрымку крайне правых, крайне левых і ў цэлым крайне папулісцкіх рухаў і партый.

Каб прыйсці да гэтай высновы, журналісты і даследчая група Follow the Money вывучылі гадавыя справаздачы больш чым 200 партый у 25 краінах.

На наступным тыдні маюць прайсці выбары ў Еўрапейскі парламент. Паглядзім, ці гатовыя еўрапейцы аддаваць радыкалам не толькі грошы, але і галасы. Апытанні ўжо нейкі час паказваюць, што кансерватараў, еўраскептыкаў і прарасійскія партыі гатовыя падтрымаць нечакана многія.

Накрылі найбуйнейшы ботнэт

Ботнэт — гэта сетка камп'ютараў, якія заражаныя шкоднасным ПЗ і кантралююцца ашуканцамі. Днямі знішчаны самы буйны ботнэт у свеце. Абясшкоджвалі сетку таксама ўсім светам. Для гэтага ФБР аб'яднаўся з іншымі міжнароднымі агенцтвамі — з Сінгапура і Тайланда — і нават з тэхгігантам Microsoft.

У стварэнні сеткі абвінавачваюць грамадзяніна Кітая Юн Хе Вана. Паводле звестак Міністэрства юстыцыі, ботнэт узламаў больш за 19 мільёнаў IP-адрасоў амаль у 200 краінах. Яго выкарыстоўвалі для арганізацыі кібератак, буйнога махлярства і іншых злачынстваў. Мяркуецца, што з дапамогай шкоднаснага ПЗ стваральнікі сеткі скралі агулам 5,9 млрд долараў.

Сам Ван, паводле звестак амерыканскага Мінюста, сярод іншага прадаваў доступ да IP-адрасоў і атрымаў за гэта каля 99 мільёнаў долараў. Калі яго прызнаюць вінаватым па ўсіх пунктах абвінавачання, яму пагражае 65 гадоў турмы.

Занадта нават для Беларусі

Мы думалі, што выбары ў Каардынацыйную раду — гэта жорстка (на кандыдатаў завялі крыміналкі і абяцаюць забраць маёмасць). І тут паглядзелі на падзеі ў Мексіцы: там таксама ідзе выбарчая кампанія, і толькі ў адным штаце забілі ўжо пяцярых кандыдатаў у мэры і аднаго — у дэпутаты.

А наогул з верасня мінулага года былі забітыя прынамсі 22 чалавекі, якія балатуюцца ў мясцовыя органы ўлады. Што гэта за дзікунства? Прэзідэнт Андрэс Мануэль Лопес Абрадор у пачатку красавіка прызнаў, што злачынныя картэлі такім чынам спрабуюць паставіць на чале гарадоў сваіх людзей. Яны вылучаюць уласных кандыдатаў і ліквідуюць патэнцыйных супернікаў.

Цяпер урад прыставіць целаахоўнікаў прыкладна да 250 кандыдатаў. А выбарчыя ўчасткі (выбары пройдуць ужо ў гэтыя выходныя) будуць ахоўваць каля 27 тысяч салдат і чальцоў нацыянальнай гвардыі.

Нечаканы (ці чаканы?) прыхільнік

Яшчэ адна пара падумвае пра тое, каб наладзіць адносіны. Пагаворваюць, што Ілан Маск можа стаць дарадцам Дональда Трампа, калі той пераможа на выбарах у ЗША сёлета.

Але... гэта ж той самы Маск, які яшчэ нядаўна блакаваў акаўнт Трампа ў Твітары! Зрэшты, з таго часу Твітар стаў Х, а акаўнт Трампа вярнулі на месца. Бачыце, нават пасля такой "замарозкі" адносін ёсць шанс на другі шанс!

Кажуць, цяпер Трамп і Маск стэлефаноўваюцца пару разоў на месяц. Трампу патрэбныя грошы і вядомыя прыхільнікі, а Маску — магчымасць рэалізаваць свае палітычныя ідэі. Зрэшты, фінансаваць палітычную кампанію Трампа Маск не плануе. Але нібыта сказаў Трампу, што правядзе сустрэчы з уплывовымі бізнесоўцамі і пераканае іх не падтрымліваць Джо Байдэна.