СМІ: У Мінску другі раз за год знізілі норму грамадскага транспарту
Другі раз за год мінскія ўлады зменшылі норму па забеспячэнні гараджан грамадскім транспартам. Цяпер адзін аўтобус (трамвай, тралейбус, вагон метро) прыпадае на дзве тысячы чалавек — як у выходныя дні, так і ў будні. Пра гэта піша tut.by са спасылкай на рашэнне Мінгарвыканкама, апублікаванае на Нацыянальным прававым партале.
Яшчэ ў 2003 годзе Мінгарвыканкам прыняў рашэнне "Аб устанаўленні пераліку дзяржаўных мінімальных сацыяльных стандартаў па абслугоўванні насельніцтва горада Мінска". У гэтым дакуменце былі прапісаныя нормы неабходнага забеспячэння гараджан ў розных сферах — ад ЖКГ да грамадскага харчавання.
Згадваецца там і грамадскі транспарт. Спярша норма складала адзін аўтобус (тралейбус) на лініі на 1,5 тысячы чалавек. У лістападзе 2016 года гэтую норму знізілі — 1,55 тысячы чалавек у будні і 2 тысячы ў выходныя.
Цяпер жа гарадское кіраўніцтва зраўняла нарматыў транспарту ў будні і выходныя. У выніку сем дзён у тыдзень на дзве тысячы мінчукоў павінен прыпадаць адзін аўтобус (трамвай, тралейбус, вагон метро).
