Як кандыдаты ў прэзідэнты разам балелі за БАТЭ (фота+відэа)
Раманчук дакладна прадказаў вынік гульні, а Кастусёў пагадзіўся, каб эканаміст гэтым разам выйграў. Тым часам Някляеў "сілай слова" супакоіў п'яных фанатаў.
...Мы сабраліся каля стадыёна "Дынама" вялікай кампаніяй. Уладзімір Някляеў, Рыгор Кастусёў і Алесь Міхалевіч прывялі сяброў, і толькі Яраслаў Раманчук прыйшоў адзін. Каб наведаць футбол, эканаміст ахвяраваў мерапрыемствамі XIII Мінскага форуму. Вось гэта азарт!
![](/files/styles/in_report/public/field/image/2010/11/1662/14519.jpg)
![](/files/styles/in_report/public/field/image/2010/11/1662/14520.jpg)
![](/files/styles/in_report/public/field/image/2010/11/1662/14521.jpg)
Шкада, але ад запрашэння на вырашальны для беларусаў матч групавога этапу Лігі Еўропы адмовіліся іншыя патэнцыйныя кандыдаты. Статкевіч спаслаўся на паездку па рэгіёнах, Рымашэўскі — на партыйны сход. А Саннікаў паведаміў Еўрарадыё, што ён бы і з радасцю, але ў час матчу будзе вельмі заняты. І таму будзе глядзець футбол... па тэлевізары! "Дык жывая ж трансляцыя", — азадачыліся мы, але Андрэй Алегавіч супакоіў: паглядзіць ў запісе!
Як звычайныя заўзятары, патэнцыйныя кандыдаты прайшлі двайны кантроль: спачатку ля славутых дынамаўскіх арачак, пасля — на ўваходзе на трыбуны. Што праўда, ні ў каго нічога не знайшлі.
![](/files/styles/in_report/public/field/image/2010/11/1662/14522.jpg)
Стаўленне да "шмону" ў палітыкаў цалкам супрацьлеглае. "Даўно мяне так не шчупалі. Маглі б яйка нават знайсці, каб усярэдзіне было! — прызнаўся Ўладзімір Някляеў. — Я мяркую, што ўсё гэта вельмі проста было б зрабіць, набыўшы нейкую электроніку і не чапаючы людзей".
![](/files/styles/in_report/public/field/image/2010/11/1662/14523.jpg)
![](/files/styles/in_report/public/field/image/2010/11/1662/14524.jpg)
"Я думаю, што гэта абгрунтавана, і цалкам стаўлюся з разуменнем да таго, што такі прапускны рэжым мусіць быць, — пракаментаваў "праверку" Алесь Міхалевіч. — У тыя часы, калі я актыўна хадзіў на футбол, была расфасаваная ў дробную такую пластыкавую тару гарэлка, і людзі, што прыходзілі на стадыён, добра так "ужывалі", што часам заканчвалася не вельмі добра".
Шалёныя 1990-я ў мінулым, таму прадбачлівыя людзі прыходзяць "загружаныя" ўжо да ўваходу на стадыён. Адзін з такіх заўзятараў вырашыў прастаяць увесь матч проста перад патэнцыйнымі кандыдатамі. А калі яго папрасілі сесці, пачаў шукаць, з кім бы "пайсці-выйсці". І нават знайшоў Алега Мяцеліцу.
![](/files/styles/in_report/public/field/image/2010/11/1662/14525.jpg)
Але да спрэчкі далучыўся Някляеў і хутка ўсадзіў маладога чалавека на месца. Па вуснах паэта можна было прачытаць нешта накшталт "Сядзь і глядзі футбол!", але за змест гэтага выказвання мы адказнасці не нясем.
"Хлопцы былі нармалёва выпітыя і хацелі таньчыць на футболе. А я ім нагадаў пра фізічны закон супадзення рэзанансаў. Ведаеце, калі ўсе таньчыць пачнуць... Але яны, відаць, слова гэтага не зразумелі і пачалі перапытваць: "А шшшшто ты сказаў?!" Ну тут давялося патлумачыць, і яны пасля спакойна сядзелі. Не падумайце, я не лаяўся, нічога такога... Сіла слова!"
Зразумела, перад матчам усе палітыкі паставілі на перамогу БАТЭ. Кастусёў прадказаў лік 2:0. Міхалевіч скардзіўся, што за футболам не сочыць, але зрабіў такі ж прагноз, як і Някляеў — 2:1.
"Моцная гэта каманда малдоўская, — кажа Ўладзімір Някляеў. — Я памятаю, стаўку зрабіў на матч "Малдова" (Кішынёў) — "Дынама" (Мінск), калі я вось тут праз плот пералазіў, тады яшчэ гулялі Мустыгін, Адамаў. Я якраз заклаўся, што нашы выйграюць 2:1, і яны выйгралі 2:1. Я думаю, трэба захоўваць традыцыі, таму 2:1".
![](/files/styles/in_report/public/field/image/2010/11/1662/14526.jpg)
![](/files/styles/in_report/public/field/image/2010/11/1662/14527.jpg)
Найбольш аптымістычны прагноз даў Раманчук: 3:1 на карысць БАТЭ!
"БАТЭ выйграе 3:1, тут без варыянтаў. Каб не перакладаць вырашэнне свайго лёсу на "Дынама" (Кіеў) і іншыя каманды. Свая паляна, і мэта ў хлопцаў відавочная. Таму, я думаю, канцэнтрацыя будзе, і будзе перамога!"
![](/files/styles/in_report/public/field/image/2010/11/1662/14528.jpg)
Але першы тайм не абяцаў ні буйнога ліку, ні перамогі БАТЭ. "У гульні было шмат тактычнай барацьбы", — скажа на пасляматчавай прэс-канферэнцыі Віктар Ганчарэнка.
Патэнцыйныя кандыдаты сышліся ў меркаванні, што "лік па гульні". Але пагадзіліся і з тым, што нагода для занепакоенасці ёсць. "Трэба Лідзію Міхайлаўну клікаць на дапамогу — шчыраваў Кастусёў. — Пакуль нармальна гуляем, але калі што яна падправіць статыстыку. Калі будзе 2:1, каб яна зрабіла 2:0".
Але ў другім тайме БАТЭ зрабілі ўсё самі. Галы Паўлава і Брэсана прымусілі палітыкаў паўскокваць з месцаў, крычаць і абдымацца ад радасці, як з лепшымі сябрамі. Праўда, Алесь Міхалевіч замест кампаніі калегаў хацеў бы апынуцца ў фанацкім сектары:
"Мне хочацца быць у эпіцэнтры падзеяў. А тут гэта фанацкі сектар. Там, дзе сапраўдныя заўзятары. Каб калі ішла хваля па стадыёне, яна не магла ісці праз тое, што людзі ўвесь час стаяць", — сказаў ён.
![](/files/styles/in_report/public/field/image/2010/11/1662/14517.jpg)
Гульнёй і вынікам матчу ўсе былі вельмі задаволеныя. "На стадыёне зусім іншая атмасфера, энергетыка, людзі. Па тэлевізары гэта не ўбачыш. Таму я заўсёды, калі ёсць магчымасць, — толькі на стадыён. Таму што гэта як канцэрт, як тэатр, як само жыццё", — дзяліўся эмоцыямі захоплены аўтар дакладнага прагнозу на матч Яраслаў Раманчук. Той жа думкі трымаецца і Ўладзімір Някляеў, які ўвогуле лічыць сябе "стадыённым, а не канапным чалавекам".
"Хачу сказаць Еўрапейскаму радыё для Беларусі вялікі дзякуй за тое, што арганізавалі нас. Бо, шчыра кажучы, самі бы мы не выбраліся. Я на стадыёне "Дынама" не быў больш за 10 гадоў, хаця ў Магілёве хадзіў і апошнім часам на матчы "Дняпра". А гульня БАТЭ мне вельмі спадабалася, і я вельмі задаволены, што нашая каманда перамагла", — дадаў Рыгор Кастусёў.
Хаця БАТЭ і выйшаў у плэй-оф Лігі Еўропы датэрмінова, нашым футбалістам засталося яшчэ двойчы згуляць на групавой стадыі. Матч з AZ пройдзе ў Галандыі. А вось кіеўскае "Дынама" БАТЭ прымае ў Мінску 2 снежня. "Гэта прынцыповае для нас супрацьстаянне, таму мы паспрабуем заплюшчыць вочы на турнірную табліцу", — паабяцаў Віктар Ганчарэнка.
Дарэчы, 4 лістапада стадыён "Дынама" роў, як след. Была і "хваля", і пераклічка заходняй і ўсходняй трыбунаў. "Наперад, Барысаў!" — крычалі людзі. Недзе ў гэтым хоры — галасы Ўладзіміра Някляева, Алеся Міхалевіча, Рыгора Кастусёва і Яраслава Раманчука.