У Іспаніі сёння пройдзе агульнанацыянальны страйк
Да яго заклікаў Усеагульны саюз работнікаў краіны і прафзвязнае аб'яднанне "Працоўныя камісіі".
Чакаецца, што ў страйку супраць эканамічнай палітыкі ўрада прымуць удзел больш за 150 грамадскіх арганізацый краіны, паведамляеюць інфармагенцтвы.
Прафсаюзы і ўлады Іспаніі дамовіліся пра захаванне мінімуму паслуг у дзень страйку. Заканадаўства краіны абавязвае страйкоўцаў узгадняць з уладамі мінімальны гарантаваны аб'ём перавозак і працы іншых службаў у перыяд акцыі. Ён не павінен быць меншы за 25% ад агульнага аб'ёму паслуг. Страйк не закране выратавальныя і экстраныя службы.
Дарэчы, Еўрапейская канфедэрацыя прафсаюзаў таксама заявіла, што правядзе сёння агульнаеўрапейскі "Дзень дзеянняў". Ён накіраваны супраць палітыкі жорсткай эканоміі ў краінах ЕС. Падчас акцыі ў розных еўрапейскіх краінах, у тым ліку ў Грэцыі і Партугаліі, пройдуць дэманстрацыі ды страйкі.
Фота — ru.euronews.com
