Правальскі паскардзіцца на Вярхоўны суд і на Лукашэнку
Незарэгістраваны кандыдат у прэзідэнты Уладзімір Правальскі накіруе скаргу на суддзю кіраўніку краіны.
Пасля гэтага Правальскі папросіць, каб Цэнтравыбаркам адмяніў рэгістрацыю Лукашэнкі кандыдатам. Прэтэндэнт лічыць, што кіраўніка краіны зарэгістравалі незаконна.
Паседжанне Вярхоўнага суда паводле скаргі Правальскага наконт яго нерэгістрацыі кандыдатам прайшло з парушэннямі, лічыць ён. Нагадаем, паседжанне адбылося 22 лістапада, скаргу Правальскага суд не задаволіў. Прэтэндэнт лічыць, што суд прайшоў з парушэннямі заканадаўства. Пра гэта ён распавёў у размове з Еўрарадыё.
Правальскі: "75% маіх заяваў і хадайніцтваў наогул не былі разгледжаныя. Адзіныя дзеянні – падаць заяву менавіта на імя прэзідэнта аб прыцягненні суддзі да дысцыплінарнай адказнасці. Цяпер будзе рыхтавацца заява аб тым, каб адмянілі незаконную рэгістрацыю Лукашэнкі кандыдатам у прэзідэнты".
Няспраўджаны кандыдат дадаў, што працягне займацца палітыкай, але нікога з зарэгістраваных кандыдатаў не падтрымае.