Расія перакладае фінансавыя выдаткі на структуры беларускай чыгункі

Дзяржаўнае прадпрыемства "Белінтэртранс" (БТЛЦ), якое ўваходзіць у структуру Беларускай чыгункі, атрымала ад расійскага АТ "ОТЛК ЕРА" прэтэнзію на суму больш за адзін мільён долараў. Пра гэта піша "Супольнасць чыгуначнікаў Беларусі".

Раней паведамлялася, што БТЛЦ фактычна крэдытуе партнёраў, даючы адтэрміноўкі плацяжоў за ўжо выкананыя перавозкі. У выніку фарміруюцца запазычанасці на дзясяткі мільёнаў долараў, якія не пагашаюцца ў вызначаныя тэрміны.

Цяпер жа выстаўлена новае фінансавае патрабаванне. "Супольнасць" валодае дакументам, з якога вядома пра 44 асобныя выпадкі, зафіксаваныя на працягу 2025 года і пачатку 2026 года.

Гэтыя патрабаванні звязаныя не з форс-мажорнымі абставінамі, а з аперацыйнымі выдаткамі перавозачнага працэсу: затрымкамі вагонаў, дадатковымі зборамі за інфраструктуру іншых краін, тарыфнымі надбаўкамі і санкцыйнымі абмежаваннямі.

Адзначаецца, што значная частка гэтых выдаткаў фарміруецца па-за межамі Беларусі — у тым ліку ў выніку рашэнняў расійскіх і казахстанскіх структур, тарыфнай палітыкі і дзеючых абмежаванняў.

Аднак фінансавая нагрузка па гэтых выдатках фактычна ўскладаецца на БТЛЦ. Усе дадатковыя выдаткі, незалежна ад іх паходжання, канцэнтруюцца на беларускам баку.

Нягледзячы на тое, што АТ "ОТЛК ЕРА" з’яўляецца сумеснай расійска-казахстанска-беларускай структурай, створанай для развіцця кантэйнерных перавозак па напрамку Кітай — Еўропа, на практыцы менавіта гэтая кампанія вызначае маршруты, кіруе грузапатокамі і фарміруе ўмовы працы. А роля БТЛЦ — кампенсаваць узнікаючыя фінансавыя наступствы.

Як адзначаюць у "Супольнасці", на фоне ўжо існуючай значнай дэбіторскай запазычанасці гэта стварае дадатковы фінансавы ціск на БЧ і яе аператара — БТЛЦ.

У такой мадэлі няма раўнамернага размеркавання рызык паміж краінамі. Гэта ставіць БТЛЦ у залежнае становішча ад Расіі ў межах агульнага транспартнага калідора.