Пятро Маркелаў прыйшоў у суд у касцюме калядоўшчыка (фота)
Суд над моладзевым актывістам Пятром Маркелавым 18 студзеня не адбыўся: суддзя адправіў дакументы на дапрацоўку.
Працэс пачаўся сёння ў судзе Цэнтральнага раёна. Маркелава вінавацілі ў паўторным на працягу года парушэнні парадку правядзення масавых мерапрыемстваў.
Нагодай для суда стала так званае “Канаплянае калядаванне”, якое 25 снежня зладзілі ў Мінску актывісты ініцыятывы Legalize Belarus. У шэсці бралі ўдзел больш за 15 чалавек. Яго ўдзельнікі выступалі за рэформу артыкула 328 Крымінальнага кодэкса, які рэгулюе абарот псіхаактыўных рэчываў і ўводзіць крымінальную адказнасць. Юнакі шпацыравалі па цэнтры горада, спявалі вясёлыя песні і неслі стылізаваныя выявы канаплянага лісця.
Дарэчы, у суд Маркелаў таксама прыйшоў з атрыбутам "канаплянага калядавання" — каляднай зоркай у форме канаплянага лісця.