Вы тут

Праваабаронцы патрабуюць спыніць знішчэнне грамадзянскай супольнасці Беларусі

Па грамадзянскай супольнасці наносіцца магутны ўдар / Ілюстрацыйнае фота pixabay.com

Беларускія праваабаронцы патрабуюць "спыніць кампанію па знішчэнні арганізацый грамадзянскай супольнасці [Беларусі], па запалохванню і пераследу актывістаў, па татальнаму падаўленню свабоды выказвання меркаванняў". Яны пратэстуюць супраць "ціску і пераследу арганізацый грамадзянскай супольнасці, кіраўнікоў і актывістаў арганізацый і ініцыятыў". Нагадваюць, што ў офісах НДА і ў кватэрах актывістаў прайшлі дзясяткі ператрусаў, а "у апошнія дні ўлады прынялі захады па ліквідацыі арганізацый грамадзянскай супольнасці" — некамерцыйныя арганізацыі ліквідуюцца дзясяткамі (прычым нярэдка без папярэджванняў і выстаўлення прэтэнзій).

"Дадзеная кампанія, відавочна, накіраваная на поўную ліквідацыю трэцяга сектара, татальнае знішчэнне любой грамадзянскай актыўнасці, падаўленне любой ініцыятывы, — гаворыцца ў заяве. —Такія дзеянні з’яўляюцца абуральным парушэннем міжнародных абавязацельстваў Рэспублікі Беларусь у галіне свабоды асацыяцый і выказвання меркавання".

БХК, Беларускі ПЭН-цэнтр, ПЦ "Вясна" (пазбаўлены рэгістрацыі ў нашай краіне), "Прававая ініцыятыва", Беларускі дакументацыйны цэнтр і Беларускі дом правоў чалавека імя Барыса Звозскава заклікаюць міжнародныя арганізацыі "публічна выказаць сваю ацэнку дзеянням уладаў, выкарыстоўваць усе магчымыя спосабы для аказання ўплыву на змяненне сітуацыі".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.