Прадстаўнік пантыфіка ў Беларусі заклікае ўлады паскорыць працэс "амністыі"
Антэ Ёзіч, прадстаўнік Папы Рымскага ў Беларусі, заклікае ўлады нашай краіны паскорыць працэс "амністыі". Як паведамляе catholic.by, гэтыя словы прагучалі падчас урачыстасцяў у Бялынічах.
Амбасадар Ватыкана вітаў прынятае рашэнне ўладаў вызваліць 13 палітзняволеных, якія былі памілаваныя.
"Неабходна паскорыць гэты працэс, каб дазволіць сем’ям з’яднацца і вярнуцца на працу і ў свае святыні, — заявіў Антэ Ёзіч. — Гэта, без сумневу, пойдзе толькі на карысць працэсу нацыянальнага прымірэння ў краіне дзеля агульнага дабра".
Як вядома, за кратамі ў Беларусі знаходзяцца тысячы чалавек, затрыманыя і асуджаныя за ўдзел у пратэстах супраць фальсіфікацыі вынікаў прэзідэнцкіх выбараў. Амаль 700 з іх прызнаныя праваабарончай супольнасцю палітвязнямі. Вызваленне ўсіх палітвязняў — адна з умоваў Захаду афіцыйнаму Мінску, які прагне адмены санкцый.
