На "Гродна Азоце" будуць рыхтавацца да санкцый Еўрасаюза

Гендырэктар ААТ "Гродна Азот" Ігар Ляшэнка даручыў распрацаваць захады па арганізацыі працы прадпрыемства на выпадак увядзення еўрапейскіх санкцый супраць Беларусі. Пытанне павінна быць прапрацаванае сумесна з канцэрнам "Белнафтахім". Пра гэта паведамляе прэс-цэнтр "Гродна Азота".

У "трэці пакет" санкцый Еўрапейскага саюза трапілі некалькі беларускіх прадпрыемстваў: Dana Holdings / Dana Astra, "Сінезіс", 140-ы рамонтны завод, "Агат", "Белтэхэкспарт", Кіраўніцтва справамі прэзідэнта, МЗКЦ. Верагодна, на "Гродна Азоце" чакаюць, што прадпрыемства патрапіць у "чацвёрты пакет" санкцый, які ў цяперашні час ўзгадняецца.

Прадпрыемствы канцэрна "Белнафтахім" ужо бывалі пад эканамічнымі санкцыямі. Праўда, амерыканскімі. Іх унеслі ў чорны спіс у 2011 годзе, пасля таго, як 19 снежня 2010 Лукашэнка жорстка разагнаў мітынг пасля прэзідэнцкіх выбараў і затрымаў некалькіх кандыдатаў у прэзідэнты. У цяперашні час гэтыя санкцыі прыпыненыя. Яны будуць пераглядацца ў красавіку.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.