Хіба ён, беларускі рубель, яшчэ не ўпаў?
"Гэта, дарэчы, яшчэ не канец. У цэлым прагнозы і экспертаў расійскага рынку, і беларускіх сыходзяцца: курс расійскага рубля будзе аслабляцца, але гэта будзе адбывацца адносна плаўна. Чаму так адбываецца? На гэта ёсць фундаментальныя прычыны: санкцыі запрацавалі, Расія атрымала ўдвая меншы даход у экспарце нафты і газу сёлета ў параўнанні з папярэднім годам. А мы ведаем, што Расія — гэта, у прынцыпе, вялікая бензакалонка для ўсяго свету.
Як толькі там падаюць даходы ад экспарту нафты і газу (а цяпер яшчэ і металы патаннелі), то руйнуецца і эканоміка. А калі не руйнуецца, то прынамсі прасядае. Цяпер мы назіраем гэты самы доўгатэрміновы трэнд, калі даходы расійскага бюджэту скарачаюцца з прычыны таго, што скарачаюцца даходы ад экспарту нафты і газу. І гэта ўплывае на курс расійскага рубля".
Са слоў Кавалкіна, паслабленне расійскага рубля вельмі выгаднае расійскаму Цэнтрабанку і расійскаму Мінфіну:
"У іх бюджэт дэфіцытны, і самы просты спосаб папоўніць яго — гэта дэвальвацыя. Як гэта адбываецца? Калі курс рубля ў адносінах да долара падае, то ў Расіі робіцца больш рублёў, бо за адзін і той жа долар даюць больш рублёў. Адпаведна, больш рублёў паступае ў казну. Таму ў слабога рубля ёсць вельмі моцныя хаўруснікі ў асобе і расійскага Цэнтрабанка, і расійскага Мінфіна. Таму, хутчэй за ўсё, палітыка будзе такая: аслабляць курс, але без рэзкіх рухаў цела і шокаў, каб збалансаваць бюджэт".
Прагноз Кавалкіна: следам за дэвальвацыяй у Расіі будзе інфляцыя.
"Яна спрацуе як неаб'яўлены дадатковы "падатак на расіян". Расіянам гэта, вядома, не спадабаецца, але хто ў іх будзе пытацца. Ім Салаўёў па тэліку раскажа, як да гэтага ставіцца, і яны павераць. Уласна кажучы, так і зафіналіцца ўся гэтая сітуацыя".
А што ж будзе з беларусамі?
"У беларусаў вельмі добра развітыя інстынкты. Рэжым Лукашэнкі вучыць беларусаў з 1994-га года не давяраць уладзе і не давяраць рублю", — рэзюмуе Кавалкін.
