Мужчыну, які павесіў цяжарную сабаку, аштрафавалі на 200 долараў

Мужчыну, які павесіў цяжарную сабаку аштрафавалі на 4,2 млн рублёў (каля 200 долараў). Такую пастанову вынес суд Рэчыцкага раёна, інфармуе sputnik.by.

Здарэнне адбылося ў пачатку студзеня сёлета. У лесе каля вёскі Бронная Рэчыцкага раёна мясцовая жыхарка знайшла павешаную на дрэве цяжарную сабаку. Справа атрымала шырокі розгалас. Міліцыя знайшла зламысніка. На гаспадара сабакі склалі пратакол за жорсткае абыходжанне з жывёламі, якое стала прычынай смерці. Ён тлумачыў свае дзеянні тым, што ўзніклі праблемы з суседзямі, якія скардзіліся на жывёлу.

Мужчына яшчэ можа абскардзіць рашэнне рэчыцкага суда ў Гомельскім абласным судзе.