Вы тут

Мужчына на Магілёўшчыне трое сутак правёў у балоце: у яго адмовілі ногі (відэа)

Кадр з відэа

У Клічаўскім раёне Магілёўшчыны ратавальнікі тры дні шукалі зніклага чалавека, паведамляе прэс-служба МНС. 

83-гадовы жыхар Магілёва зранку 26 ліпеня пайшоў з дома ў бок мікрараёна Грабянёва і знік. З пятніцы па нядзелю супрацоўнікі МНС і МУС абследавалі лес каля мікрараёна Грабянёва, знайсці пенсіянера не маглі. 

Шукаць мужчыну спрабавалі з дапамогай відэакамер па яго меркаваным маршруце ў прыватным сектары. Аднак на відэакамерах чалавека з яго прыкметамі таксама не выявілі. Таму далейшыя пошукі ў лесе палічылі немэтазгоднымі.

Пяцёра супрацоўнікаў МНС прааналізавалі зыходныя дадзеныя і прапанавалі пашукаць зніклага магілёўца ў пойменным лузе плошчай 3 квадратныя кіламетры. На дапамогу ім прыбылі дадаткова 20 работнікаў МНС і 23 супрацоўнікі міліцыі.

Праз нейкі час яны знайшлі зніклага пенсіянера жывым. Трое сутак ён правёў у забалочанай мясцовасці без ежы, вады і сувязі. Выявілася, што ў яго адмовілі ногі, і ён не мог рухацца. 

Мужчыну аказалі першую медыцынскую дапамогу і на насілках даставілі на ўсюдыходзе да медыкаў.