Вы тут

МУС: тэлеграм-канал "Беларусь галаўнога мозгу" прызнаны экстрэмісцкім

Папулярны тэлеграм-канал прызналі экстрэмісцкім / pixabay.com

Тэлеграм-канал "Беларусь галаўнога мозгу" прызнаны экстрэмісцкім, паведамляе прэс-служба МУС. Такое рашэнне прыняў 19 красавіка суд Чыгуначнага раёна Гомеля. Падставай для рашэння сталі матэрыялы абласнога ўпраўлення ГУБАЗіК МУС.

Як заяўляюць у МУС, у канале "сістэматычна размяшчаліся экстрэмісцкія матэрыялы, у тым ліку накіраваныя на распальванне сацыяльнай варожасці, а таксама абразы прадстаўнікоў праваахоўных органаў і дзяржслужбоўцаў".

Па словах міліцэйскай прэс-службы, удзельнікі канала "рэгулярна заклікалі да масавых беспарадкаў, вулічных пратэстаў, хуліганстваў, радыкалізацыі, вандалізму, супраціву міліцыянтам, блакаванні руху на аўтамабільных дарогах і чыгунках".

Цяпер за рэпост інфармацыі з гэтага тэлеграм-канала прадугледжанае пакаранне аж да арышту.

"Беларусь галаўнога мозгу" — чацвёрты па колькасці падпісантаў ТГ-канал у Беларусі.

Адзначым, што па стане на 17:35 20 красавіка ў Рэспубліканскім спісе экстрэмісцкіх матэрыялаў гэты тэлеграм-канал адсутнічае.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.