Вы тут

Лукашэнка расказаў, за што затрымалі дырэктара холдынга "БелОМА"

president.gov.by

Аляксандр Лукашэнка распавёў пра затрыманне гендырэктара холдынга "БелОМА" Вячаслава Бурскага. Гэта адбылося 12 лютага, калі ён даваў згоду на прызначэнне Аляксандра Мароза гендырэктарам ААТ "Мінскі механічны завод імя С.І. Вавілава — кіруючая кампанія холдынга "БелОМА".

Як паведамляе прэс-служба Лукашэнкі, ён запатрабаваў ад новага кіраўніка ўжо да канца года добрых вынікаў дзейнасці. Пры гэтым ён даў дазвол гендырэктару прыязджаць у Міністэрства прамысловасці і ставіць ім задачы ад імя кіраўніка дзяржавы. 

Таксама ён перасцярог новага дырэктара ад карупцыі. Ён згадаў пра затрыманне папярэдняга гендырэктара. "Яны заніжалі кошт, наколькі я памятаю гэтую крымінальную справу. Там заніжалі кошт на ваш тавар, а розніцу дзялілі паміж спажыўцом у Расіі і частку клалі сабе ў кішэню", — распавёў Лукашэнка падрабязнасці справы. 

Як паведамлялася раней, гендырэктара "БелОМА" Вячаслава Бурскага затрымалі напрыканцы студзеня. Генпракурор Аляксандр Канюк адмовіўся расказваць журналістам, у чым вінавацяць гендырэктара "БелОМА". Па яго словах, у такіх сітуацыях бывае і апраўдальны прысуд.