Канцэрн Henkel выставіў на продаж свае актывы ў Беларусі і Расіі
Навучальны цэнтр Ceresit у Барысаўскім будаўнічым ліцэі / ais.by
Нямецкі канцэрн Henkel выставіў на продаж свае актывы ў Расіі і Беларусі. Кампанія вырабляе ў тым ліку бытавую хімію пад гандлёвымі маркамі Persil, Losk, "Дэні", "Ласка", "Пемас", "Пемалюкс", Vernel.
У справаздачнасці кампаніі за першае паўгоддзе 2022 з'явілася інфармацыя, што актывы ў Расіі і Беларусі пераведзеныя ў раздзел "На продаж". На гэта звярнула ўвагу выданне "Ведомости". У Расіі кампаніі належыць 12 офісаў і 11 заводаў у розных рэгіёнах. У Беларусі ў Henkel ёсць завод па выпуску будаўнічых сумесяў Ceresit, ён размешчаны ў Заслаўі.
Купіць актывы могуць расійская кампанія "Технониколь" , альбо кітайскі, альбо турэцкі бізнес, кажуць эксперты. Але папярэджваюць, што ўгода будзе няпростай — цана актываў завышаная.
Сама кампанія ацаніла свае страты ад сыходу з Расіі і Беларусі ў €184 млн, з іх €88 млн — гэта шкода дзелавой рэпутацыі. Адзначым, што Henkel уваходзіць у спіс 500 найбуйнейшых кампаній свету і працуе больш чым у 70 краінах.
