Інаўгурацыі Аляксандра Лукашэнкі: ад Пагоні да ўзмоцненай аховы
![Інаўгурацыі Аляксандра Лукашэнкі: ад Пагоні да ўзмоцненай аховы](/sites/default/files/styles/gallery_main/public/2023-08/snimok_ekrana_2015-11-06_v_15.24.11.png.webp?itok=QirL3Zw_)
Першая цырымонія ўступлення на пасаду прэзідэнта Беларусі праходзіла 20 ліпеня 1994 года на ўрачыстым паседжанні Вярхоўнага Савета. Аляксандр Лукашэнка прыняў прысягу на Канстытуцыі. За спінай першага прэзідэнта вісеў бела-чырвона-белы сцяг і Пагоня, а клятва давалася на Канстытуцыі 1994-га года. Пасля прамовы Аляксандр Лукашэнка прапанаваў для зацвярджэння Вярхоўным Саветам кандыдатуры прэм'ер-міністра, віцэ-прэм'ераў, сілавых міністраў і гэтак далей. Інаўгурацыя прайшла досыць хутка, урачыста, але без празмернасцяў.
У 1996 годзе ў Беларусі праходзіць рэферэндум, вынікі якога не прызнаюць ні Еўрасаюз, ні Злучаныя Штаты. Тым не менш, у Канстытуцыю Беларусі прымаюцца папраўкі, якія моцна пашыраюць паўнамоцтвы Аляксандра Лукашэнкі. Больш за тое, пяцігадовы прэзідэнцкі тэрмін абнуляецца, і з гэтага моманту пачынаецца спачатку. У выніку Другая інаўгурацыя Аляксандра Лукашэнкі праходзіць праз 7 гадоў пасля першых выбараў, 20 верасня 2001 года. На мерапрыемства прыязджаюць прадстаўнікі больш, чым 50 дыпламатычных ведамстваў і міжнародных арганізацый, але шмат якія прадстаўнікі краінаў ЕС праігнаравалі запрашэнне. Пасля клятвы і прамовы на Кастрычніцкай плошчы вайскоўцы даюць клятву на вернасць беларускаму народу і прэзідэнту.
8 красавіка 2006 года праходзіць трэцяя інаўгурацыя Аляксандра Лукашэнкі. Два тыдні да цырымоніі зноў пераабраны кіраўнік краіны не з'яўляўся перад журналістамі, не рабіў ніякіх заяваў і ніяк не заяўляў пра сваё існаванне. На той момант апошняе з'яўленне Аляксандра Лукашэнка на людзях адбываецца на наступны дзень пасля выбараў, 20 сакавіка падчас прэс-канферэнцыі, прысвечанай вынікам выбараў. Стварэнню атмасферы таямнічасці, якая атачала Лукашэнку ў гэтыя дні, спрыяла і заява сакратара ЦВК Мікалая Лазавіка пра перанос інаўгурацыі, якая першапачаткова была прызначаная на 31 сакавіка. Замежных лідараў на ўрачыстую цырымонію не запрашаюць.
Мерапрыемствы, прысвечаныя інаўгурацыі, праходзяць пад узмоцненай аховай унутраных войскаў. На Кастрычніцкай плошчы ладзіцца ваенны парад. Што выглядае даволі дзіўна ў выпадку, калі за перавыбранне Лукашэнкі на трэці тэрмін галасуе 83% выбаршчыкаў краіны.
21 студзеня 2011 года ў Мінску праходзіць чацвёртая цырымонія ўступлення на пасаду "зноў абранага" Аляксандра Лукашэнкі. Амбасадары краін Еўрасаюза ў Беларусі паведамляюць, што не будуць прысутнічаць на інаўгурацыі ў знак пратэсту супраць фальсіфікацыі выбараў і рэпрэсій у дачыненні да апазіцыі і грамадзянскай супольнасці. Не прысутнічае на мерапрыемстве і часовы павераны ў справах ЗША ў Беларусі Майкл Скэнлан, бо на гэты момант знаходзіцца ў Гродне.
Пятая цырымонія інаўгурацыі Аляксандра Лукашэнкі праходзіць 6 лістапада 2015 год ў Палацы Незалежнасці ў Мінску. На інаўгурацыю запрошана больш за тысячу гасцей, у тым ліку і замежных. Лукашэнка прыносіць прысягу і падпісвае адпаведны дакумент. Пасля ўрачыстыя мерапрыемствы праходзяць на плошчы Дзяржаўнага сцяга.
Фота: n1.by