Галоўнага трэнера футбольнага клуба звольнілі праз чатыры дні працы
Міхаіл Макоўскі паспеў папрацаваць галоўным трэнерам футбольнага клуба "Маладзечна" толькі чатыры дні.
Як піша nn.by, 16 лютага Макоўскага прызначылі ў кіраўніцтва футбольнага клуба другой лігі. Але ўжо 19 лютага яго звольнілі. У гэты дзень адбывалася сустрэча трэнера з заўзятарамі і прэсай. На гэтую сустрэчу Макоўскі, як пішуць футбольныя суполкі ў сацыяльных сетках, прыйшоў п'яным. Адразу пасля заканчэння сустрэчы яго і адхілілі з пасады.
Замест яго галоўным трэнерам быў прызначаны яго родны брат Уладзімір. Ён, дарэчы, раней быў асуджаны на два гады за арганізацыю дамоўных матчаў і пазбаўлены права займаць любыя пасады, звязаныя з футболам, на працягу пяці гадоў. Гэтае прызначэнне абурыла футбольных заўзятараў, таму Уладзімір Макоўскі прабыў на пасадзе галоўнага трэнера клуба яшчэ менш, чым яго брат.
Цяпер галоўным трэнерам "Маладзечна" прызначаны Валерый Ветраў.